Waştişê Kurdan her wext û her cayî de aşitî bi û hema zî aşitî yo. No waştiş esasê xo de waştişê heme mazlûman û bindestan o. Zalimê ke zilmê xo ser o yenî zanayene û waştişê înan tena îhlalkerdişê heqanê merdiman o, her wext kenî ke heme merdimî aşitî xo ra durî bivînî. Na rewşe zaf çiyanê xiraban vejena merdimayî ver o; durîbîyayîşê aşitî hêvîya merdiman şikneno û gelek hetan ra merdimî rewşa ke înan rê ameyî ferzkerdene qebûl kenî. Ê ke qebûl kenî û kewenî boçê pergale do rojêk meseleya esasî fam bikerî labelê rewşa nikayîne de çimê pergale de statuya înan zî çin a û naye ver zî xo eîdê pergala ke hêvîya aşitî qedînena hîs kenî. Tena mîyanê sînoranê Tirkîye de nêzdîyê 30 milyonî Kurdî estî (beno ke hêna zêde bo). Naye mojneno ma ke nifûsê Kurdan her roje zêdîyeno û Kurdî ke xo eîdê pergale hîs kenî zî yê bînan ra zêde yê. Helbet sebebê na rewşe zaf ê la sebebo tewr pîl bawerbîyayîş o.
Çira bawerbîyayîş? Eke Kurdî micadele û xoverdayîşî ke bi serran o dewam kenî ra bawerîya xo pê biardêne, nika rewşa ke ma behs kenî yanî rewşa eîdbîyayîşê pergale nêbîyayêne. Çiyê ke Kurdistan de qewimyenî yanî kerdenê dewlete na rewşe mîyanê Kurdan de zêdnena aye ra zafê Kurdan xo dusenî pergale ro û bi tewrêk benî dişmenê xo. O wext zî hewce nêkeno ke dişmenêko bîn bibo. Naye ser o zî çareserî Kurdan ra kewena durî. Senî ke aşitî kewena durî, çareserî zî eynî tewir kewena durî. Qêrayîşê Kurdan her çendêk bizêdîyo zî aşitî û çareserî pîya şinî durî. Şer na rewşe de hêna zêde beno xorîn, sey 4 serranê peyênan.
Dewlete bi kerdenanê xo 4 serranê peyênan de aşitî û çareserî heme kesan ra kerd durî. Kurdî vera kerdenanê dewlete de seba aşitî û çareserî gamêk zî peyser nêeştî. Waştişê Kurdan û dostanê Kurdan çareserî bi. Rayverê Şarê Kurdî Abdullah Ocalanî hîrê pevînayîşanê xo ke avûkatanê xo de kerd de sey demanê verênan hêna aşitî û çareserî esas gêno. Wirdî esasan ser o rexneyanê xo keno. Îradeyê xo sey îradeyê aşitî û çareserî name keno û pêşnîyazanê xo keno. Seba çareserîya meseleya Kurdan di dewletan ra behsê hemparîye keno. Vano ke, Sûrîye û Tirkîye de çareserîya meseleya Kurd eynî tewir bena. Goreyê ey hema zî waştişê Kurdan eynî yê û dewletî mîyanê şaşîyan de yê. Eke ma na çarçewe ra biewnî mesela ra û eynî îrade ramojnî, o wext heme kerdenê dewlete veng şinî û pûç vejîyenî. Sûrîye û Tirkîye de çareserîya meseleya Kurdan, bena gama tewr pîl a Rojhelato Mîyanên. Gere her wirdî dewletî zî goş bidê Îmrali û vatişanê Rayverê Şarê Kurdî Abdullah Ocalanî baş fam bikerî. Vatişo peyên hêna sey her wextî yo, aşitî û çareserî her halûkarî de şerî ra başîr ê.
