Hemşaredarê Bajarê Girdî yê Mêrdînî Ahmet Turkî dîyar kerd ke ê weçînayîş de hetgirê demokrasîye yî û wina va: “Ma danî nîşandayene ke hemverê neheqî, bêhuqûqî û zilmî de vindenî. Ma rengê xo nîşan danî.”
Hemşaredarê Bajarê Girdî yê Mêrdînî yê Partîya Demokratîke ya Şaran (HDP) Ahmet Turkî derheqê weçînayîşê 23ê Hezîrane yê Stenolî de qisey kerd. Turkî Otelê Taksîm Hillî de tewrê kombîyayîşê arayîye bî. Turkî akademîsyen, karsaz û rewşenbîran reyde ame têhet. Parlamenterên HDPyî, endamê Meclîsê Dayîkanê Aştîye zî tewrê kombîyayîşî bîyî.
Turkî qiseykerdişê xo yê arayîye de ard ziwan ke ê seba çareserkerdişê problemanê şarê kurd sîyaset kenî û wina va: “Ganî ma serkêşîya şarê xo bikerî. Ma seba sibaroja şarê xo tîya de arê bîyî. Bi serran o ma seba averşîyayîşê sîyasetê demokratîke û heqê merdiman bedêlan danî. Seba ke edalet aver şêro û problemê şarê kurd bi raybazanê demokratîkan çareser bibo ma têkoşîn danî. Qet şikêk çin o ke ma her ca de temsîlkarê şarê kurd î. Heta ke heme şar sibarojêka demokratîk û azade de nero têhet, ne şarê kurd û ne zî şarê tirk nêeşkenî azad bibî. No têkoşînêko hempar o. Têkoşînê demokratîkbîyayîşê Tirkîye yo.”
Pêroyê dinya zano ke rayê kurdan çiqas muhîm î
Turkî da zanayene ke wazenî şarê kurd bê nefes vera bidî û va: “Ge-ge se serran ra tena reyên firsendêk keweno destê merdiman. Ganî ma no firsendî bixebetnî. Ewro pêroyê dinya zano ke rayê kurdan çiqas muhîm î. Zanê ke weçînitoxê kurd yê Stenbolî çiqas bi ercin î. Ma hetgirê demokrasîye yî. Ma danî nîşandayene ke hemverê neheqî, bêhuqûqî û zilmî de vindenî. Ma rengê xo nîşan danî.” STENBOL
