Sey heme weçînayîşanê 16 serrê peyînan ma bi weçînayîşê Stenbolî zî têgeyrayîş û vatişanê ecêban ê rayedaranê desthilatî rê bî şahid. Senîn ke weçînayîşê xocayî yê temamî yê 31’ê Adare de desthilatîya tekparêze hem bi kîndarîyêka nîjadperestî şarê Kurdî sey terorîst dayne ramoştişî û kerdêne hedef hem zî sey çimeyê vengan nizdê înan bîne û vatêne ‘ma talibê venganê Kurdan ê’. Eyro roc zî hetê eynî desthilatî ra weçînayîşê xocayî yê Stenbolî de hetêke bi kîndarî nizdê şarê Kurdî û ziwanê şarê Kurdî bena heto bîn ra înan û ziwanê înan propagandayê weçînayîşî de xebetnena. Şarê ma nê serrê peyînan de biyo şahid ke na desthilatî senîn bi kîndarî mudaxileyê kreş û dibistananê Kurdî, tabelayanê şaristanan, heta yê goristanan ke bi Kurdî ameyê nûştişî kerd û bêtehemuliya xo ya ziwanê Kurdî rê moşt ra. Û heto bîn ra zî bi rayîrê verendamê xo yê Stenbolî Binalî Yildirimî Amed de nameyê Kurdistanî ana ziwan û heta bi çewtî bo zî çend çekuyan bi Kurdî dana vatişî. Na desthilatî bi nizdîkahîya xo ya şarê Kurdî û ziwanê Kurdî zihniyetê hewtay serrê peyînan ê pergala xo ya mudaxilekare verê çiman de fînena ra.
Senîn tarîxe zihniyetê hewtay serre yê desthilatî de vatişê sey ‘eke nê welatî rê komînîzmêke lazim bo ey zî ma go bîyarê’ ca gêno Kurdistan û Kurdîya ke Bînalî Yildirimî Amed de xebetna yan zî vatişê verînan ê Kurdan ke parlamenterê Denîzlî yê AKP meclise de xebetna zî bi eynî zihniyetî yeno xebetnayîşî. Xo ra yeno zanayîşî ke TRT 6 û dersê weçînayey yê bi Kurdî zî bi eynî zihnîyetê xo vistê fealîyet. Meseleya na pergale ya esasî bi xo bidestvistişê weçînayîşan o. Rayîrê weçînayîşan de eşkena xo bifîno heme dilqan. Eşkena xisleto ke tede çinîyo sey ke este bimojno ra yan zî xisletê ke merdimahî rê sey nan û awe lazim ê xo ra dûrî bifîno. Rayêke bîne şarê Kurdî û heme şarê ke Tirkîye de ciwîyênê benê şahid ke na desthilatî rayîrê destvistişê weçînayîşan de bi heme awayî ya xo exlaq û etîkê merdimahî ra şona û nê xisletanê merdimahî kena fedayê menfaetanê xo.
Senîn ke her weçînayîşê Tirkîye trajedyan rê beno sehne eynî awayî komedyan rê zî beno sehne Mûrsîyo ke serokwezîrê civiste yê Misirî yo bi mergê xo weçînayîşê Stenbolî de hevalokê xo rê bi malezmeyê weçînayîşî. Dimayê mergê Mûrsî bi rayîrê vîrardişê ey vatişê sey ‘Ma go roco yewşeme vacê Sîsî yan vacê Bînalî Yildirim? zî înan ra yew o. Îmamoglûyo ke weçînayîşê 31’ê Adare de ageyrabi Pontûso Yûnanic wina eyseno weçînayîşê 23’yê Hezîrane de zî ageyra Sîsîyo Misiric. Ma bedelnayîşê merdiman ê dînê xo fam kenê. Her merdim eşkeno her wext dînê xo bibedelno la çîyo ke nîno famkerdişî merdimêke senîn eşkeno nîjadê(eslê) xo bibedelno(?) Bi qaso ke ma zanê merdim nêeşkeno daye û bayê xo, nîjad û ziwanê xo weçîno. Ayetanê Qûranê Kerîmî de zî ameyo ramoştişî ke semedo ke însanî jobînan têra bikerê Homayî înan qewm bi qewm cîya xulqnayê. Loma heqê ti merdimêke çinîyo ke yewî bi eslê ey bidarazno. Erdogano ke dimayê weçînayîşê 31’ê Adare vatib ‘ma asin serdin bikerê wina eyseno ke o bi xo ancî kewto xebata sûrkerdişê asinî. Weçînayîşê Stenbolî ancî asin kerd sûr de hela ma banîrê dimayê weçnayîşî asin kono çi rewş î.
