Pêşmergeyên PDK’ê piştî hevdîtina Nêçîrvan Barzanî ya bi Erdogan re, xwe ji girên li Kanîmasiyê vekişandin û gir bi temamî radestî leşkerên dewleta tirk kirin
Dewleta tirk ji bo dagirkirina başûrê Kurdistanê êrîşeke mezin daye destpêkirin. Di vê çarçoveyê de dixwaze herêma Xakûrkê dagir bike û kontrola xwe ya li ser temamiya başûrê Kurdistanê mayînde bike. PDK ku hemû cureyên alîkariyê dide hêzên dagirker ên dewleta tirk, niha jî dest bi pêkanîneke pir qirêjî kir.
Li gorî agahiyên ku ji herêmê hatine wergirtin, pêşmergeyên girêdayî PDK’ê li Dilman û Baroxê û li şeş cihên nêzî gundê Baroxê yên li Kanîmasiyê xwe vekişand û li rojavayê gund bi cih bûn. Çavkaniyên ji herêmê da zanîn ku li girên ku pêşmergeyan xwe jê vekişandine û şeş cihên li ser sînor, leşkerên tirk ên li Duhokê hatine bicihkirin.
Piştî ku pêşmergeyên PDK’ê cihên xwe ji leşkerên tirk re hiştin, tê diyarkirin ku li qada Kanîmasiyê leşkerên tirk amadekariyên leşkerî dikin. Cihguhertina di navbera pêşmergeyên PDK û leşkerên tirk de, piştî hevdîtina Erdogan a bi Nêçîrvan Barzanî re pêk hat.
Li gorî geşedanan, dewleta tirk piştî êrîşên dagirkeriyê yên li dijî Bradost û Xakûrkê, niha jî dixwaze li dijî Metîna êrîşa dagirkeriyê bide destpêkirin. BEHDÎNAN
