Şayîya ciwanan ya bi serkêşîya Şaredarîya Sîlopî ya HDPyî ya vera fihûş û madeyê heşberdoxî de, bi hezaran kesî ameyî têhet û şewêka bicoşe ciwîyayî
Qezaya Sîlopî ya Şirnexî de, bi serkêşîya şaredarîye ya Partîya Demokratîke ya Şaran (HDP), vera fihûş û madeyê heşberdoxî yo ke nê demanê peyênan de bajar de zêde bîyo, şayîya ciwanan ameye viraştene. Şayîye wareyê Newroze de ameye viraştene. Parlamentera HDPyî Dersim Dage, Nûran Îmîre û Huseyîn Kaçmaz, hemşaredarê bajarî, rayberî û xebatkarê şaredarîye û bi hezaran kesî beşdarê şayîye bîyî. Şayîya ke zafaneyê ci ciwanî beşdarê ci bîyê de, grubê muzîkî Umut Botan, Vengê Cinîyanê Azadan û Koma Gulê Xerzan vejîyayî sehne.
Reyêka bîne ma ser kewtî
Dimayo ke wekîlanê HDPyî girse yew bi yew silam kerd, parlementera HDPyî Dersim Dage qiseykerdişêko kilm kerd. Dage bale ante serê prosesê çalakîyanê grevê vêşanîye yê vera tecrîdkerdişê Rayberê PKKyî Abdullah Ocalanî û vat: “Dimayê vengdayîşê Ocalanî çalakîya grevê vêşanîye qedîyabî. Ma xoverdayîşêkê neweyî ra vejîyayî. Ma çalakîya xo de ser kewtî.”
Dage vengdayîş bi ciwanan kerd ke meclîsê ciwanan ê HDPyî de xo rêxistin bikerê û wina peynîya qiseykerdişê xo arde: “Heta ke ciwanî bibê, faşîzm do tu cara ser nêkewo.”
Badê qiseykerdişê Dage bêmabên sloganî seba Ocalanî û vera fihûş û madeyê heşberdoxî ameyî qîrayene. Şayîye heta saetanê ereyê şewe dewam kerd. ŞIRNEX
