Piştî ku pêşmergeyên PDK’ê xwe ji girên stratejîk ên Kanîmasiyê vekişand û leşkerên dagirker ên dewleta tirk li şûna xwe bi cih kirin, artêşa tirk îro dest bi topbaran kirine herêma Metînayê kir
Serokê Herêma Federe ya Kurdistanê Nêçîrvan Barzanî pêr bi serokê giştî yê AKP’ê Tayyîp Erdogan re li Enqereyê hevdîtin kir. Piştî daxuyaniyê jî Barzanî got ku dê di rojên pêş de tiştên cuda biqewimin. Rojek bi ser gotinên Nêçîrvan Barzanî re derbas nebû ku pêşmergeyên PDK’ê xwe ji girên stratejîk ên li herêma Kanîmasiyê vekişand û leşkerên tirk lê bi cih kirin.
Weke ku tê zanîn ev herêm dikeve ber qadên Metînayê. Balkêşe ku piştî hêzên pêşmerge girên stratejîk ên başûrê Kurdistanê pêşkeşî artêşa tirk kirin, artêşa tirk li dijî Metînayê jî dest bi êrîşan kir.
Li gorî agahiyên ji çavkaniyên herêmê, hêzên artêşa tirk îro ji saet 14:00’an ve bi hawan û obusan derdora gundê Bêdehê û Derîşk ên Metînayê bombebaran dike. Çavkaniyan da zanîn ku ji ber bombebarana li ser herêmê, zirarekî mezin gihîşt bax û baxçeyan.
Bombebarana li ser herêmê berdewam dike. BEHDÎNAN
