Goreyê netîceyanê nêfermîyan ê Heyetê Weçînitişî yê Bajarê Stenbolî Ekrem Îmamoglûyî serekîya Şaredarîya Bajarê Girdî ya Stenbolî bi 4 mîlyon û 741 hezarî û 868 rayan qezenc kerde
Dimayê qerarê betalî yê Heyetê Weçînitişî yê Berzî (YSK) weçînitişê serekîya Şaredarîya Bajarê Girdî yê Stenbolî weçînitiş newe ra ame kerdene, goreyê netîceyanê nêfermîyan namzedê CHPyî Ekrem Îmamoglûyî 4 mîlyon û 741 hezarî û 868 rayî girewtî. Namzedê AKPyî Bînalî Yildirimî zî 3 mîlyon û 935 hezarî û 453 rayan de mend.
Zabitnameyê yewkerdişî yê derheqê netîceyanê weçînitişê Şaredarîya Bajarê Girdî yê Stenbolî hetê Heyetê Weçînitişî yê Bajarî ra Adlîyeya Stenbolî de, panoyê Mudurîya Weçînitişê Bajarê Stenbolî rê ameyî daleqnayene.
Goreyê nê netîceyan, 10 mîlyon û 570 hezarî û 354 weçînitoxan ra 8 mîlyon û 925 hezarî û 63 weçînitoxî şîyî sindoqan û rayê xo şuxulnayî. Nê rayan ra 8 mîlyon û 746 hezarî û 464 hebî ravêrte ameyî hesebnayene, 178 hezarî û 599 hebî nêravêrte ameyî hesebnayene.
Goreyê netîceyanê ke fermî nêyê, Ekrem Îmamoglûyî serekîya Şaredarîya Bajarê Girdî ya Stenbolî bi 4 mîlyon û 741 hezarî û 868 rayan qezenc kerde. Îmamoglûyî se ra 54,2 yê rayanê ravêrteyan girewt, Bînalî Yildirimî zî bi girewtişê 3 mîlyon û 935 hezarî û 453 rayan se ra 44,99 ê reyan girewt.
Namzedê serekîya Şaredarîya Bajarê Girdî ya Stenbolî yê Partîya Saadetî Necdet Gokçinarî 47 hezarî û 829 (31ê Adare de 103 hezarî û 300) rayî, yê Partîya Vatanî Mûstafa Îlker Yucelî zî 14 hezarî û 545 rayî girewtî. STENBOL
