Hemserekê Pêroyî yê HDPyî Sezaî Temellîyî beşdarê Konferansê Herêma Egeyî yo ke hetê partîya ci ra ameyo organîzkerdene bi
Hemserekê Pêroyî yê Partîya Demokratîke ya Şaran (HDP) Sezaî Temellîyî beşdarê Konferansê Herêma Egeyî yo ke hetê partîya ci ra ameyo organîzkerdene bi. Temellî ard ziwan ke, weçînayîşî êdî apey mendî û bale ante serê muhîmîya înîsîyatîf girewtişî.
Ma her ca de sîyaset bikerê
Temellîyî konferas de qisey kerd û va: “Ma kotî de benê bibê, taxa xo de, keuçeyê xo de kotî beno wa bibo sîyaset bikerê. Ma heqê xo yê sîyasetkerdişê hewaleyî kesî nêkerê. Eke ma hewale kerd, mîyanê 4 serran de Tirkîya kotî ra yeno guneno kotî ra ma dîye. Çîyo ke ma 24ê Hezîrane de kerd, newe ra dawetkerdişê merdiman bi sîyasetî bi. Ma no kerd. Ma merdimî newe ra dawetê sîyasetî kerdî. Xebatêko bizehmet û giran bi la ma ser kewtî.”
Şiknayîşê tecrîdî hemlayêka krîtîke bîye
Temellîyî bala ante serê şiknayîşê tecrîdê serê Rayberê PKKyî Abdullah Ocalanî û va: “Ganî no tecrîd biameyêne şiknayene. Şiknayîşê nê tecrîdî hemlayêka krîtîke bîye.”
Ganî prosesê muzakereyî dest pêbikero
Temellîyî va: “HDP do vera faşîzmî têkoşînê xo dewam bikero. Bi heme awanî û sazgehanê xo. Demokrasîyo radîkal, demokrasî yo ke muzekere keno yo. Seba ke ma ameyoxî rêxistin û awan bikerê, hîna ke erey nêkewto ganî ma ewro ra gaman bierzê. Meseleyê îtîfakê demokrasî yo ke ma qalê ci kenê no vengdayîş o. Bêrê ma pîya problemanê Tirkîya çareser bikerê û rayîrê ci abikerê. Bêrê ma îtîfakê demokrasî de bêrê têhet. Bêrê ma qisey bikerê. Bêrê Ocalanî reyde qisey bikerê. Muxetabê meseleyî reyde muxetab bibê. Teyna ma HDPyijî ney, ganî hemê cimat û kerdoxê Tirkîya înîsîyatîf bigêrê û qisey bikerê. Vengdayîşê HDPyî na xete ser o yo. Ma îtîfaqê Demokrasîyî reyde heme cimatî seba qiseykerdiş, pîyakarkerdiş û muzakereyî dawet kenê.”
Goştarîya HDPyî bikerê
“Heme partîyî, AKP bo, MHP bo, ÎYÎ Partî ba û CHP bo ganî goştarîya HDPyî bikerê. Şewe û roje HDPyî reyde bi zelemeleyî şima nêeşkenê rayîr bigêrê. Şima parlamentar ê. Şima mecbûrê ke yewbînî bivînê û qisey bikerê. Tirkîya şima rê aşitîya cimatkî pawena. Ganî şima na babete de gaman bierzê.” ÎZMÎR
