Parlamenterê HDPyî yê Çewlîgî Erdal Aydemîrî da zanayene ke rayîrê pêroyê dewanê elewîyan yê Çewlîgî nêviraşte yê û waşt ke ganî babetê nê dewan cade bêrê halkerdene
Parlamenterê Partîya Demokratîke ya Şaran (HDP) yê Çewlîgî Erdal Aydemîrî babeta elewîyanê ke herêma Karerî ya Çewlîg de yê kiriştî rojdemê meclîsî.
Aydemîrî vat: “9 dewê ke herêma Karerî de yê zafê înan elewî yê. Nê cayan rê wextê ronayîşê komare ra xizmet nêameyo berdene. Ma kewenê serra 2020î la hema rayîrê dewan nêameyî viraştene. Sunîyan û elewîyan rê eynî xizmet nêno kerdene. No seserre ya ke wina yo. Bitaybetî zî herêma Karerî de hem rayîrî nêameyî viraştene hem zî xeta telefonî çîn a. Meseleyê awe esta. Dibistan çîn o. Nê dewê elewîyan xizmetê weşîye ra zî mehrûm ê. Seserr a ke hem hetê sîstemî hem zî hetê îdareyanê herêmî ra bi zanayîşî elewîyî cîya yenê tepiştene û heme xizmetan ra mehrûm yenê verdayene. Ganî cade rayîrê nê dewanê herêma Karerî bêrê viraştene û heme babetê înan ê bînî zî bêrê çareserkerdene.” ANQARA
