Qeyûmê Nisêbînê Ergun Baysal li pey xwe 32 milyon lîre deyn hişt. Her wiha wesayîteka şaredariyê ya bi cureya 4×4 diyarî midûriyeta polîsan kir û gelek malên şaredariyê jî dewrî midûriyeta perwerdeyê kir
Qeyûmê Nisêbînê Ergun Baysal ku ji aliyê wezîrê karên hundir ve tayînî şaredariya Nisêbînê hatibû kirin, di hilbijartina 31’ê adarê ya rêveberiyên herêmî de piştî HDP’ê dîsa şaredarî bi dest xist, karê wî bi dawî bû. Qeyûm ku dema li ser kar bû, piştî hilbijartina 31’ê adarê zêdetirî 32 milyon lîre deyn li pey xwe hişt. Dîsa derket holê ku gelek mal û milkên şaredariyê jî diyarî saziyên dewletê kirine.
Di lêkolînê xuya bû ku dema qeyûm hatiye ser kar, di qaseya şaredariyê de 6 milyon û 388 hezar lîre hebûn. Di serdema qeyûm de milyonek û 930 hezar û 561 lîre pere ma. Dîsa hate ragihandin ku qeyûm Baysal, şaredariya Nisêbînê 32 milyon û 369 hezar û 51 lîreyan deyndar kiriye. Li hêla din, qeyûm Baysal wesayîta zeviyan a 4×4 ku bi bihayê 149 hezar û 500 lîreyane, diyarî Midûriyeta Polîsan a Nisêbînê kir.
Her wiha qeyûm Baysal Navenda Ciwanan a HDP’ê girt û avahiya ciwanan jî ji bo 25 salan da midûriyeta perwerdehiyê. Derket holê ku mal û milkên şaredariyê beriya hilbijartinê dewrî saziyên dewletê hatine kirin. Dîsa avahiyên li bajaroka Kertwên, Gire Mîra û Stîlîlê dewrî midûriyeta perwerdehiyê hatine kirin. MÊRDÎN
