Kongreya Komela Demokratîke (KCD) Şêx Seîdo ke 29ê Hezîrane serra 1925î de hetê rejîmê tirkî ra ameybî dardekerdene û emazanê ci vîr ard
Kongreya Komela Demokratîke (KCD) derheqê babete de eşkerayîyêka nuştekîye weşanaye û daye zanayene ke 29ê Hezîrane hişê şarê kurdî de wextêko muhîm o. Eşkerayîya KCDyî de wina ame vatene: “29ê Hezîrane serra 1925î sey heme şaranê dinya şarê kurdî zî waştişê xoserîye, azadîye, demokrasî û edaletî kerd, la çi heyf ke no tarîx bi tarîxê komkiştişî, tasfîye û çinkerdişî.
Lîderanê şarê kurdî ra Şêx Seîd û hemrayê ci 29ê Hezîrane 1925î de hetê ‘Mehkemeyanê Îstîklalî’ ra ameyî dardekerdene ke nê mehkemeyî seba înkarkerdişê estbîyayîşê şarê kurdî û caardişanê polîtîkayanê çinkerdiş û qirkerdişî ameyî awankerdene.
Şêx Seîd û embazê ci sey vizêrî ewro zî sey meşale rayîrê şarê Kurdî roşn kenê û vernîya ma akenê. Înan, verê çimanê şarê kurdî û şarê dinya de mîyanê kesanê ke seba azadîye, têduştîye û edalatî têkoşîn danê de cayê xo girewt. Labelê ê kesê ke vanê ma ‘Mehkemeyanê Îstîklalî’ de bi dardekerdişê nê kesan, ma daweya înan û şarê kurdî bi xo darde kerdo, bizanê ke tarîxê 29ê Hezîrane 1925î vîr û wijdanê şarê kurdî de ameyo mehkûmkerdene.
Şarê kurdî meşaleya ke Şêx Seîd û embazê ci tafîşta tu cara erd de nêverda û bi hawayêkê serkewtişî heta na roje arda. Tornê înan, Vakur, Başûr, Rojawanî û Rojakewtene de rayîrê azadîye de xeylî destkewteyê girdî kerdî ra xo dest û mîraso ke înan ra girewto seveknayo.
Wa ruhê înan şad bo!…
Şehadetê înan yê serrgêra 94. de, şarê ma çar parçeyanê Kurdistanî de têkoşînê xoverdayîşê azadîye dano. Nika, çar parçeyanê Kurdistanî de serrgêra 94. ya şehadetê Şêx Seîdî û embazê ci yena yadkerdene.” AMED
