Hêzên general Haftar ên li rojhilatê Lîbyayê ragihandin ku wan balafireke bêmirov a dewleta tirk îmha kirine. Hêzên Haftar piştî ku şeş welatiyên tirk binçav kirin ew berdan
Wezîrê Karên Derve yê tirk Mevlut Çavûşoglû Yekşemê bi daxuyaniyekê ragihandibû ku şeş tirk ji aliyê hêzên Halîfe Haftar a Lîbyayê ve hatine binçavkirin û gef xwaribû ku ger neyên berdan dê bersivê bidin.
Çend saet piştî vê daxuyaniyê, artêşa Halîfe Haftar ragihand ku balafireke bêmirov a tirk a bi tîpa Bayraktar li balafirgeha Trablûsê hatiye îmhakirin. Di daxuyaniyê ku ji aliyê artêşa Haftar ve hat dayîn de hat destnîşankirin ku wan balafira tirk îmha kirine û ev agahî ragihand: “Balafirên me balafireke bêmirov a bi tîpa Bayraktar di dema rabûnê de kirin hedef û li pîsta leşkerî îmha kirin.”
Wezareta Karên Derve ya tirk Duşemê daxuyaniyeke din weşand û diyar kir ku tirkên hatin binçavkirin hatine berdan.
Haftar beriya du rojan Tirkiye weke ‘dijmin’ ragihandibû û ferman dabû ku li hedefên tirkan bên xistin. Heftar bi rêya berdevkê xwe Ehmed El Mesmarî daxuyanî da, ragihand, qada hewayî ya Libyayê ji balafirên tirk re hatiye girtin. Heftar ragihand fermand daye yekîneyên bin kontrola wî ku li keştî û tesîsên tirk ên li herêmê bixin. Generalê Libyayî diyar kir wê balafirên Tirk ku bixwazin dakevin Trablûsê û ketiyên nêzî perevan bibin mîna ‘dijmin’ werin dîtin û hişyarî da ku hemû welatiyên tirk ên li Libyayê wê werin girtin. General her wiha got wê hebûna leşkerî ya li Tirkiyeyê jî bibe hedef. TRABLÛS
