Hûmara temmuze ya rojnameyê cinî Newaya Jin bi manşetê ‘Xopawitiş heq o’ vejîyaye
Hûmara 172. ya Newaya Jinî yo ke roportajêkê Leyla Guvene tede ameyo weşanayene, giranîye daya sere dewaya cinîyanê ke hemverê hêrişan de xo pawito. Babetê şorişê Rojawanî, zanistî, ekolojî, îdareyo demokratîk ra heta rojdemê Ewropa û dinya xeylî babetî hûmara temmuze ya Newaya Jinî de estê.
Xoverdayoxa grevê vêşanîye Leyla Guvene Fîgen Ektî dir qisey kerd û ard ziwan ke bi grevê vêşanîye înan waşt ke ramojnê tecrîd sûcêkê hemverê merdimîye yo. Guvene vat ke bi xoverdayîşê xo înan waşto ke rayîrê aşitîyêka bianore akerê û wina domnaye: “Cuyêka azadîperwere ya cinî û demokratîke mumkun a.”Guvene seba bicaardişê nê amacî veng daye.
Tirkîya de ke hêrişê çetinî û zayendîyî bi hawayêkê sîstematîkî yenê kerdene, hemverê cinîyanê ke xo hemverê hêrişan de pawenê çetinîya hakimîya camêrdî û bêedaletî dewam kenê. Xeberdaranê Jin Newsî ra Habîbe Erene û Melîke Aydine derheqê babete de xeber-dosya amade kerde û vînayîşê temsîlkaranê sazîyanê cinîyan pare kerdî.
Şorişê Rojawanî yo ke her roja xo bi şerêkê çetinî, bi zehmetî û xoverdayîşêkê bi qehremanîyî ravêrt keweno serra xo ya heştine. Zerya Gule babeta wareyê ci ra ercnaye û bale ante sere muhîmîya şorişê cimatkî, kulturkî, zanistî, felsefîkî û zihnîyî.
Hûmara temmuze ya Newaya Jinî de roportajêko taybet ameyo weşanayene. Fermandaranê FARCî ra Tanja Nijmeire Zîlan Dîyar û Eylem Tolhildane rê qisey kerdî. Rojnamekare Heval Aslane zî weçînitişê Parlamentoyê Ewropa ercnayî. Rojnamekare Sûne Tûnçe zî rojdemê Îranî û Rojakewtena Kurdistanî rîpelê kurdkî de şîrove kerd û halê Îranî yê herême û mudaxeleyêko muhtemel ercna. Tûnçe vat ke Îran de şertî seba şorişê şarî estê.
Hemşaredara Cizîre Berîvan Kûtlû rolê şaredarîyan îdareyanê xocayîyan de ercna û vat, metodê îdareyî û kulturê demokratîkî bi serkêşîya cinîyan eşkeno bica bêro. Derheqê awbendê Ilisûyî de ke do Hesenkeyfî binê awe de verdo dosyayêk amî amadekerdene. Rîpelanê zanistîye de Ozlem Yavûze û Gonul Erdogane, rîpelê cimatî de zî Axîn Vîyane vînayîşê xo pare kerdî.
