Mabênê îdarekaranê Hêzê Sûrîyeya Demokratîke (HSD) û Neteweyê Yewbîyayeyî (NY) de peymanêka planê hemparî yê qedexekerdişê domanan ê leşkerîye û şer de pawitişê înan amî îmzakerdene.
Mabênê îdarekaranê Hêzê Sûrîyeya Demokratîke (HSD) û Temsîlkara Taybete ya Şerê bi Çekî û Domanan ya Sekreterîya Pêroyîye ya Neteweyê Yewbîyayeyî (NY) Vîrgînîa Gamba de seba qedexekerdişê domanan yê mîyanê şerê herême pêvînayîşî ameyî kerdene. Bi tesdîqkerdişê HSDyî û Îdareyê Xoserî yê Vakur û Rojakewtena Sûrîye, NYyî dir 29ê Hezîrane de peymanêka plane hemparî awanîya dîyine ya tewr pîle ya NYyî ya Palaîs des Natîions a Cenevre de amî îmzakerdene.
Merasîmê îmzakerdişî yo ke Ofîsa Cenevre ya NYyî de ame viraştene de, temsîlkara taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba, fermandarê HSDyî yo pêroyî Mezlûm Ebdî, fermandara Yewîya Pawitişê Cinîyan (YPJ) ya pêroyîye Newroz Ehmede û hemserekê Meclîsê Rayberdişî yê Îdareyê Xoserî yê Vakur û Rojakewtena Sûrîye Ebid Ham el-Mîhbaş amade bîyî.
Temsîlkara taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba eşkerayîyêk daye û HSDyî zî bi îmzakerdişê peymane tesdîq kerd ke do bi tu hawayî rayîr nêro dayene ke domanî zereyê şerî de ca bigêrê û domanan çekdar bikerê. Eşkerayîye de bale amî antene ke bi îmzakerdişê peymane eke mîyanê hêzanê înan de kesê ke emrê înan binê 18î de yo estbê do bêrê vetene û ancî vernîya çekdarkerdişê domanan û mîyanê şerî de şuxulnayîşê înan bêro girewtene.
Temsîlkara taybete: Rojêka muhîm a
Temsîlkara Taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba ard ziwan ke îmzakerdişê HSDyî ya na peymana qedexekerdişê çekdarkerdişê domanan û hemverê nê de vetişê înan muhîm o û va: “Ewro Sûrîye de seba pawitişê domanan rojêka muhîme yena ciwîyayene, heman wextî de destpêkê merheleyêka newî amî tesdîqkerdene ke do HSD rayîr nêdo ke binê sîwanê xo de tu domanêk bêro çekdarkerdene û zereyê operasyonan de bêro wezîfedarkerdene.”
Eşkerayîye de ame bi vîr vistene ke îmzakerdişê na peymane netîceyê kombîyayîşanê dûr û dergan ê mabênê îdarekaranê NYyî û HSDyî de bica ameyo. Temsîlkara taybete ya NYyî Gamba vat ke peymana derheqê qedexekerdişê domanan ê çekdarkerdişî seba vurayîşê tewirê hetanê şerî, vernîgirewtişê binpaykerdişanê giranan ê hemverê domanan û hetê rindkerdişê halê domanan ra xeylî muhîm a.
Gamba veng da heme hêzanê ke zereyê raporê şerwananê domanan ê Sekreterîya Pêroyîye ya NYyî de yê, seba bêçekkerdişê domanan gamanê laziman bierzê. Îdarekaranê HSDyî spasîyê xo pêşkêşê NYyî kerdî, ard ziwan ke Îdareyo Xoser meseleyê polîtîkayanê domanan de hetê îdarekaranê NYyî de yo. CENEVRE
