Bi wesîleya serrgêra 26. ya Qirkerdişê Madimakî bi des hezaran kesî ver bi Otelê Madimako ke qirkerdiş tede ameybî kerdene kewtî rayîr
Sêwas de roja 2ê Temmuz a 1993î 33 roşinvîrî seba ke tewrê aktîvîteyanê Pîr Sûltan Abdalî bibê şîbî Otela Madimakî û rastê hêrişî ameyî. Roşinvîrî, pîya bi di wezîfedaranê otele bi paştîdayîşê dewlete hetê kîtle ra ameybî vêşnayene û qetilkerdene. Serrgêra 26. ya qirkerdişî de, çarçewaya aktîvîteyanê vîrardişî de bi des hezaran kesî saetanê sibayî de, di nuqteyan de ameyî pêser.
Seba vîrardişê bi serkêşîya Komeleya Kulturê Pîr Sultan Abdalî (PSAKD) cemxaneyê Weqfê Kulturî yê Haci Bektaşî Velîyî û Şûbeyê PSAKDî yê Sêwasî sey adresê pêserameyîşî ameyî bewlîkerdene. Xeylî komeleyê sivîlî û partîyê sîyasîyî tewrê vîrardişî bîyî. Partîya Demokratîke ya Şaran (HDP), Partîya Herêmê Demokratîkî (DBP), CHP û Partîya Kede (EMEP) mîyanê nînan de ca girewtî.
Kîtleyî, di nuqteyan ra kewtî rayîr û ver bi Caddeya Fîdanlikî ya ke cayê têhetameyîşî ya şîyî. Dimayo ke kîtleyî tîya ameyî têhet bi eştişê sloganan ver bi Otela Madimakî kewtî rayîr. Rayraşîyayîş de fotografê kesanê ke qirkerdişî de cuya xo vînî kerda ameyî kiriştene. Kîşta nê de seba temsîlê tembûrê Hasret Gultenîkî tembûrî zî ameyî kiriştene. Rayraşîyayîş de sloganê sey ‘Ma Sêwas xovîr ra nêkerd’, ‘Hemverê faşîzmî de doş bi doşî’, ‘Pîr Sûltanî nêmirenê, xoverdayîş beno pîl’ û ‘Hesabê Sêwasî do bêro persayene’ ameyî eştene. SÊWAS
