Gardiyanên Girtîgeha Tîpa L ya Patnosê bi hinceta ku belge îmze nekiriye, li girtiyê bi navê Abdulhadî Ay xistin. Di encama lêxistinê de çavekê Ay reş û şîn bû û perasiyeka wî jî şikest
Girtiyê bi navê Abdulhadî Ay ku li Girtîgeha Tîpa L ya Patnos a Agiriyê ji ber bûyereke edlî tê girtin, ji ber ku belgeyeke naveroka wê ne dizanî nexwest îmze bike, ji aliyê gardiyanan ve hate derpkirin.
Ji ber tundiya ku li Ay hatiye kirin, malbat wî serî li Şaxa Komeleya Mafên Mirovan (ÎHD) a Amedê da. Malbatê xwest ku berpirsyar bên tespîtkirin û cezakirin. Malbatê bi navbeynkariya Serdozgeriya Komarê ya Dicleyê, serî li Serdozgeriya Komarê ya Patnosê da û serlêdana sûc kir.
Têkildarî mijarê birayê Ay, Sadik Ay anî ziman ku birayê wî 10 salin girtiye û 2 salin li Girtîgeha Tîpa L ya Patnosê tê girtin. Ay wiha domand: “Birayê min di 26’ê hezîranê de ji hêla gardiyanan ve hate derpkirin. Gardiyan diçin qawîşa wî û dixwazin ku belgeyekî îmze bike. Ji ber ku nexwestiye belgeyê îmze bike, ji hêla 5 gardiyanan ve tê derbkirin û rastî heqaretê tê. Hevalê birayê min Ayhan Demîr jî derp dikin.”
Ay wiha bi dawî kir: “Piştre jî parêzer bi birayê min re hevdîtin kir û got; ‘Çavekê wî reş û şîn bibû û girtî bû. Di serê wî de şopên lêdanê hebûn. Perasiyekê wî jî şikandine. Min ji rêveberiya girtîgehê rapora lêdanê xwest, lê rapor nedan min.’ Em dixwazin berpirsyar bên cezakirin û birayê min sewqî girtîgeheke din bikin.” AMED
