Hinê aseno ke denklemê sîyasetê Tirkîya de, kurdî zî estê. Û kurdî, qederê weçînayîşê Tirkîya tayîn kenê. Weçînayîşê 31 Adare de û 23ê Hezîrane de, semedo ke Tifaqa Komarî (Cûmhûr Îtîfaqi) vînî biko/bikero kurdan; şaristananê xo de, namzetê xo nawitê, rojawan de zî destek da namzetanê Tifaqa Netewîyî (Millet Îtîfaqi). No stratejîyê weçînayîşî, cayê xo girewt. Kurdî, na saete ra pey polîtîk têgeyrenê. Nika ra pey zî kam ke şer de û politikaya înkar û îmhayî de israr biko, siyaseten cewabê xo gêno. Na saete ra pey zî kurdî; yewerî rê hinê leleyey nêkenê.
31ê Edare, weçînayîşêko muhîm bi. Çunku Sîstemê Serekkomarîye de, rejîmê yew merdimî awan bibi. Parlemento bê îrade menda. Dadgehî tede, hêzê polîsan û leşkeran, sazîy û dezgeyê dewlete dekewtê binê destê yew merdimî. Welatê kurdan de sazî û dezgeyê demokratîkî ameyê qefilnayîş/padayîş. Hemserek Selahattîn Demîrtaş û Fîgen Yuksekdag tede, wekîl, îdareker û aktîvîstê HDP debîyê zîndanan. 94 şaredaranê HDP rê qayimî tayin biybê. HDP; weçînayîşê 31ê Edare, se “Referandûmê Demokrasî” îlan kerd. Propagandaya xo, no esasê ser o pratîze kerde. Çunku Rejîmê Yew merdimî û Tifaqa Komarî, semedo ke rayanê xo vêşî biko Weçînayîşê 31ê de kurdî, xo çim ra vetîbê. Semedo ke kurdan, rayê xo dayê HDP, se terorîst îlan kerdê. La no hesabê înan nêtewîşt. Çunku no edebîyatê terorîstîy û barkerdoxîye, kurdan îqna nêkeno. Partîyanê verînan, HDP, şaredarîyan û Sazîyan û dezgeyanê kurdan; kurdan mîyan de adeta yew şel (kok) visto. Kurdî hinê nêxapînê.
Her weçînayîş ra ver, gala/hêrişê kurdan kerdnî û Rojawan de AKP, rayê xo vêşî kerdnî. Weçînayîşê 31 Edare û Weçînayîşê 23ê Hezîrane de, na propagandaya înan nêtewişte/nêtepîşte. Kurdan, nê wirdê weçînayîş de, vera Tifaqa Komarî (Cûmhûr Îtîfaqi), destek da Tifaqa Netewîyî (Millet Îtîfaqi). Partîya AKP; Anqara, Edna, Antalya, Mersîn, Stanbul vînî kerdê. Semedo ke Weçînayaşê Şaredarîya Stanbulî batal bibo, AKP û MHP muraceatê Heyetê Wçînayîşê Berzî kerd. No îtîrazî ser o Weçînayîşê Stanbulî 23yê Hezîrane de newe ra bi. No weçînayîş de, namzetê CHPyî Ekrem Îmamoglûyî, kurdan reyra diyalogo germin viraşt û rayê kurdan girewtê. 806 hizar rayî vîşî girewtê û Ekrem Îmamoglû bi serekê Şaredarîya Stanbulî. Weçînayîşê Stanbulî ra pey Tirkîye, hinê Tirkîya verêne nîya. Kam sevano va vajo, hinê gemîya AKP awe gêna. Partîya AKP, hinê yewerî cezb nêkena. Hinê ne şuxûlnayîşê Dînê Îslamî, ne zî politikaya înkar û îmhayî, ne zî hinê politikaya nîjadperestîye bazar veynena. Hinê aseno ke AKP mîyan de zî yew bêrehetîye esta. Rojev de, sazbîyayîşê/ronayîşê yewna partî esto. Yewna partî saz bibo zî nêbo zî goreyê ma, tena yew rayîr mendo. Ay rayîr zî rayîrê demokrasi yo, rayîrê çareserkerdişê meseleya kurdan o. No dewr de politikaya zorî, pere nêkena. No dewr de, politikaya îmha û înkarî pere nêkena.
Teber de zî yew Polîtîkaya şaşe pratîze bena. Yew het ra Rûsya ra Fuzeyê S-400î girewtiş, yew het ra Amerîka ra Patroît û teyareyê cengî talepkerdiş, yewna het ra Qetar û Birayanê Muslumanan (Musluman Kardeşler) reyde, yewna het ra Îranî reyde têkilî viraştiş yew gureyê aqilî nîyo. Xora polîtîkaya Sûrîye zî îflas kerda. Teber de zî ganî polîtîkaya cengî û îşgalî nê, polîtîkaya aşîtî û dostanîye esas bigêrîyo. Raşta ey goreyê ma, Tirkîye; teber ra bi girewtişê fuzeyan, bi girewtişê tanqan û topan, bi girewtişê teyeranê cengî wayîrê yew hêzî nêbena. Ancax bi politikaya demokratîke, bi politikaya heq û huqûqî, bi politikaya diyalog û aşîtî wayîrê îtîbarî û wayîrê yew hêzî bena. Ancax ay wext, hem zerre de, hem zî teber de, tifaqê sağlem û samîmîyî virazênê. Ay wext Tirkîye de qrîzê ekonomîyî zî orte ra hewanêno.
Raşta ey, ganî Tirkîye; hinê heme hewa ra normalîze bibo. Yew het ra hinê şarê Tirkîye; huzûr û aşîtî wazenê. Şarê Tirkîye; kar/îş û aş wazenê. Şarê Tirkîye; heq, huqûq û edalet wazenê. Şarê Tirkîye; hinê ne zerre de, ne zî teber de ceng wazenê. Şarê Tirkîye; hem zerreyê Tirkîya de, hem zî tebere Tirkîye de aşîtî wazenê. Şarê Tirkîye nêwazenê ke hine gonîya ciwanan billa/vila bibo.
Eke Partîya AKP; şer de, politikaya îmha û înkarî de israr biko, siyaseten qedîna. Vanê ke; “şewa tarî şan ra bellî ya.” Weçînayîşê 31ê Edare de, bi rayanê kurdan, Partîya AKP, epey şaredarî vînî kerdê. 23yê Hezîrane de zî Weçînayîşê Stanbulî de zî rayna tescîl bi ke, aqîbeta partîya AKP, gireydayeya rayanê kurdan a.
