Hevserokê KCDK-E’yê Yuksel Koç diyar kir ku li dijî dagirkeriya dewleta tirk û hevkariya PDK’ê ya bi wê re, bi tevlêbûna sazî û rêxistinên kurdan dê di 27’ê tîrmehê de bi navê ‘Dîplomasiya Hevbeş’ komxebatekî pêk bînin û helwesta xwe ya neteweyî diyar bikin
Hevserokê KCDK-E’yê Yuksel Koç 4 rojan li Berlînê hevdîtin pêk anî û diyar kir ku di 27’ê tîrmehê de dê bi Komxebata Neteweyî re li hemberî dagirkeriya dewleta tirk helwesteke neteweyî diyar bikin.
Koç li Komeleya Civaka Azad a li Berlînê bi nûnerên saziyan û kesên serbixwe re hate ba hev. Koç der barê hevdîtinên 4 rojan de ev tişt anî ziman: “Wekî ku tê zanîn li Kurdistan, Tirkiye û Rojhilata Navîn geşedanên mezin pêk hatin. Bi berxwedanên greva birçîbûnê, destkeftiyên girîng hatin bidestxistin. Di 2’yê gulanê de bi Rêber Apo re hevdîtinek hate kirin û Rêber Apo deklarasyoneke ji 7 xalan pêk tê, ji bo raya giştî aşkera kir. Em rêveberên saziyên kurdan jî, em 4 roj in li Berlînê ne. Yek ji armanca me jî ev e ku em deklarasyona Rêber Apo belav bikin û bigihînin gelek derdoran. Li ser vî esasî ronakbîr, nivîskar û nûnerên saziyan ên Tirkiye û Kurdistanê em dicivin û nîqaşan dikin. Em bi gelek siyasetmedar, hunermend, rojnamegerên azadîxwaz, demokrasîxwaz re rûniştin.”
Di dawiyê de jî wiha got: “Wekî tê zanîn dewleta tirk li başûrê Kurdistanê dest bi dagirkeriyê kiriye. Sazî û rêxistinên kurdan jî bi navê ‘Dîplomasiya Hevbeş’ ji bo helwesta neteweyî dê di 27’ê tîrmehê de komxebatekê pêk bînin. Me di hevdîtinan de dît ku li hemberî dagirkeriya başûrê Kurdistanê û hevkarê dagirkeriyê PDK’ê divê helwesteke neteweyî hebe. Di komxebata me ya di 27’ê tîrmehê de em ê helwesta xwe ya neteweyî diyar bikin.” BERLÎN
