Dewleta tirk û çeteyên wê di nava rojên dawî de zêdetirî 300 sivîl revandin. Hêzên dagirker ji malbatên welatiyan fîdye xwestin û çavkaniyan da zanîn ku çarenûsa gelek welatiyan jî nayê zanîn
Binpêkirinên hêzên dagirker ên artêşa tirk û komên çete yên girêdayî wê yên li Efrînê yên li dijî şêniyên resen ên Efrînê, bênavber berdewam dikin. Artêşa tirk ku di çarçoveya paqijiya nîjadî de li Efrînê polîtîkayan dimeşîne, li hêlekê bi guherandina demografyaya herêmê re dixwaze Efrînê ji kurdan vala bike û li hêla din jî bi kuştin, revandin, îşkencekirin û hwd. jî li ser şêniyên Efrînê zilmekî mezin dike. Tevî van binpêkirinên di çarçoveya sûcên şer de jî, hemû cîhanê xwe li bêdengiyê daniye.
Di çarçoveya zext û zilmê de, artêşa tirk û çeteyên wê di nava çend rojên dawî de zêdetirî 300 sivîl ku gelek jê jinin, revandin. Hêzên dagirker welatî bi hincetên sosret û vala revandin û li hemberî berdana wan jî fîdyeyê ji malbatên wan dixwazin.
Çavkaniyên ji navçeya Şerayê da zanîn ku di 17’ê hezîranê de komên çeteyan welatiyên bi navên Idrîs Horo û Elî Horo yên ji gundê Zeytûnkê revandin û heta niha çarenûsa wan ne diyar e.
Her wiha çavkaniyên ji navenda Efrînê jî destnîşan kirin ku komên çete du roj berê 10 welatiyên ji navçeya Mabatayê revandin û birin cihekî nediyar. EFRÎN
