Kongreya Star a Kantona Hesekê bi armanca şermezarkirina qetilkirina jinan, daxuyaniyek da û diyar kir ku dê heta dawiyê li dijî her cureyên tundiyê yên li hemberî jinan têbikoşin
Kongreya Star a Kantona Hesekê bi armanca şermezarkirina qetilkirina 2 jinên li Hesekê li ber Çarxereya Agirkujê bi tevlibûna dehan jin û endamên saziyan, daxuyanî da.
Di daxuyaniyê de hat diyarkirin ku jin roleke girîng di jiyanê de dilîze û wiha hat gotin: “Di qada civakî, leşkerî û siyasî de her wiha di avakirina welatekî azad de jî jinan her rola xwe ya girîng lîstine. Ji dîrokê heya roja me ya îro jin her rastî qetilkirin û çewisandinê tê, her wiha gelek cûreyên şîdetê yên fîzîkî, derûnî, zayendî û destdirêjiyê li jinê tê kirin. Di heman demê de rastî şîdeta siyasî û civakî tê. Di bin siya ol û adetên civakê de jin rastî şîdetê tê. Di vê dema dawî de bûyerên qetilkirina jinan bi rengekî hovane derketiye pêş, em jî wekî rêxistina jinan hemû cureyên şîdetê şermezar dikin û li hember van bûyeran em ê têkoşîna xwe mezin bikin.
Em bang li civaka xwe dikin ku asta zanebûna xwe berfireh bikin û nirxê jinê biçûk nebînin û rê li ber qetilkirina wan bigirin. Bi qetilkirina jinan re dixwazin şoreşa jinan a li bakur û rojhilatê Sûriyeyê ku gihaştiye radeyeke pir mezin, têk bibin. Em ê li hember qetilkirina jinan bêdeng nemînin û helwesta xwe nîşan bidin.”
Her wiha daxuyanî bi dirûşma ‘Jin jiyan azadî’ bi dawî bû. HESEKÊ
