Forûmê derheqê DAIŞî de mexdûranê qirkerdişî vatî: “Seba ke seke ê nêvejîyê werte ganî endamê DAIŞî mehkemeyanê mîyanneteweyîyan de bêrê muhakemekerdene.”
Merkezê Rojawanî yê Cigêrayîşanê Stratejîkan (NRLS) qezaya Amûdê ya Qamişloyî de salona Beyselanî de komxebata mîyanneteweyîye ya derheqê çeteyanê DAIŞî de viraşte. Dimayê qiseykerdiş û sînevîzyonî yê derheqê kerdişanê DAIŞî şahidê ganeyî yê terorê DAIŞî ameyî goşdarkerdene.
Waştişê şahidanê barbarîya DAIŞî yo ke tewr zaf vejîya vernî, muhakemekerdişê çeteyan ê herêmanê Vakur û Rojkewtena Sûrîye bi.
Cinîya Êzidîye: Ma terorê DAIŞî xovîr ra nêkenê
Cinîya Êzidîye Makbûle Êzidîye ya ke Şengal ra bîye, kêfweşîya xo ya seba binkewtişê DAIŞî ard ziwan û va: “Heta ma weş bê, ma terorê DAIŞî xovîr ra nêkenê. Verê çimanê dinya de qirkerdiş virazîya. Verê çimanê ma de qirkerdiş virazîya, domanî geste ver merdî. Çew persê nê qewimîyayîşan nêkenoç Înan rotî, tecawuz kerdî, kiştî û her tewir kerdişê teberê merdimîye bica ardî. Ez zî 4 serrî destê înan de esîr menda. Xusûsen zî Êzidîyî hedefê hêrişan bîyî. Înan ma eştî zîndanan, çimê ma girêdayî. Ma destê înan ra remayî û ameyî binê hukmê Hêzê Sûrîyeya Demokratîke (HSD). Ma HSDyî ra xeylî kêfweş ê, înan hemverê DAIŞî de şerêko bêhempa kerd.”
Sûat Mirad Xelef Imra zî va: “Ma wextêk zindan de mendî û dima ra ameyî erdê Sûrîye. Bi hezaran doman û cinîyî destê DAIŞî de merdî. Ez sayeyê HSDyî de DAIŞî ra xelesîyaya. Seba ke ez qesasê cinî û domananê Êzidîyan bigêrî ez tewrê Yewîya Cinîyanê Şengalî (YJŞ) bîya. Waştişê ma no yo ke DAIŞ tîya bêro muhakemekerdene.”
Sîbel Işike ya ke gazîya Qirkerdişê 20ê Temmuze yê Pirsûsî ya zî va: “Bi nê qirkerdişan dewleta tirkî ya îşxalkare waşt îradeyê şarî bişikno. Qirkerdiş de leşker û polîsanê dewleta tirkî nêverda ke ma birîndaran berê nêweşxane. Nê qirkerdişî çi rey umîdê ma nêşikna. Heme dejê ma seypê yê. Embazê ma ye ke Pirsûs de şehîd kewtîbî vatêne wext wextê peşmîrîyayîşî yo, ganî şarê ma hendî bipeşmirîyo.” QAMIŞLO
