Endamê Konseya Rayberdişî ya KCKyî Mûstafa Karasû waşt bi ‘ruhê serewedartişî’ endamê Konseya Serekîye Dîyar Xerîbî rê wayîr bêro vetene. Karasûyî ajanî zî hîşyar kerdî û va: “Ajanî sûcêko gian o. Înanê ke no sûc kerdo do bêrê cezakerdene.”
Endamê Konseya Rayberdişî ya KCKyî Mûstafa Karasû bi meymanê programê ‘Ulkeden’ ê Medya Haber TVyî û persanê Ararat Suveyda rê cewabî dayî.
Karasûyî endamê Konseya Serekîya Pêroyîye ya KCKyî Dîyar Xerîbo ke 5ê Temmuze de, hêrişê hewayîyî de cuya xo vînî kerde bi rêz û minet bi vîr ard û va: “Embaz Helmet zereyê têgêrayîş, mucadele û partîya ma de wayîrê cayêkê muhîmî bi. Ewladêko ercaye, şorişgêrêkê şarê Başûrê Kurdistanî bi. Dejê bi desan serran, mucadeleyê şarê Başûrê Kurdistanî rind zanayêne, hîsê êyê welatperwerîye xurt bî û bi qerardarîye mucadele kerdêne.”
Karasûyî bi vîr vist ke Dîyar Xerîbî zereyê têgêrayîşê azadîye de payeyanê berzan de bi mesuldarî têgêrayo û vat organîzekerdişê şarê Başûrê Kurdistanî de, afernayîşê zihnîyetê cimatperwerî û demokratîkî de keda Dîyar Xerîbî xeylî vêşî ya.
‘Ganî şaro kurd hemverê hêrişanê winayênan de vindero’
Karasûyî va: “Ma tespît kerd ke Behdînan de xeylî hêrişî bi destê ajanan ameyê kerdene. Tîya tayê kesan bi pereyan herînenê. Ma dewrê kapîtalîzmî de yê, tayê merdimî estê ke ercê înan ê welatperwerîye zihîf bîyê, ercê înan ê cimatkî zihîf bîyê, ercê înan ê kulturkî û merdimîye zihîf bîyê. Merdimî madîyatî dima şinê. Tayê estê merdimîye ra vejîyayê, her çîyê înan bi madîyat û pereyî yeno herînayene yan zî karanê winayênan de yenê şuxulnayene. Bêguman ma nê ra dejenê. Ma na babete de hîşay kenê. Ma veng danê şarê kurdî ke na babete de hîşyar bo. Cayê ke tede yê eke ajanîye esta, ganî înan deşîfre bikerê. Karê ajanîye karêko leymin o. Êyê ke ajanîye kenê dişmenê kurdan ê. Ganî bêro zanayene ke ê dişmenîya kurdan kenê. Naye ra ganî şarê ma zî hemverê nê dişmenanê merdimîye de hîşyar bo.”
‘Şerê hemverê têgêrayîşê azadîye yeno manaya şerê hemverê hemeyê kurdan‘
Karasûyî bale ante sere eşkerayîya tayê îdarekaranê Başûrê Kurdistanî ke PKKyî seba hêrişanê dewleta Tirkî yê serê Başûrê Kurdistanî sey mazeret ramojnenê û va: “Eke Têgêrayîşê Azadîya Kurdan bêro tasfîyekerdene do çew nêeşko destkewteyanê Başûrê Kurdistanî bipawo. DAIŞî verê nikayî waştibi herême îşxal bikero, la bi ser nêkewtibi. AKP nika wazeno na yewe bi xo bikero. Hêzê başûrî na babete de xo kor kenê. Çîyo ke nêvînenê çî yo? Belê ma eşkenê vajê ke ê kor ê. Nêçirvan Barzanîyî na babete de eşkerayî daye û vat ‚dewleta tirkî her tim hetkarî daye ma.‘ Sipasîya dewleta tirkî kerde. Ma Nêçîrvan Barzanîyî ra bipersê; gama ke DAIŞî hêriş kerd, gama ke xo resna bi Hewlêrî tewirê dewleta tirkî senî bi?”
‘Gerîla bi pêtê vayî şi Kerkûk‘
Karasûyî dewamê qiseykerdişê xo de nê vatî: “Mesûd Barzanî nêbi ke vat dewleta Tirkî paştî nêdaye ma? Gerreyê xo nê ra nêkerdêne? Oyo ke vatibi Mesûd Barzanî yo, man ê yê. Heman Mesûd Barzanî dima ra şi Mexmûr, gerîlayan dir ronişt û sipasîya înan kerde. Tirêm vatişê Nêçîrvan Barzanîyî çende rast ê? Hal bi nê hawayî yo? Tirêm dewleta tirkî tim hetkarîya înan kerde, yan zî Têgêrayîşê Azadîya kurdan gama tewr krîtîke de Hewlêr pawit?
Gerîla şi Kerkûk. Waştişê seba şîyayîşê gerîlayî yê Kerkûkî kami ra ame? YNKyî ra ame. E, Kerkûk bîyêne veng, Silêmanîye bi ters û qesawet bîye. Gama ke DAIŞ bikewtêne Kerkûk do dima ra verê xo bidayêne Silêmanîye. Gerîlayan se kerd? Bi pêtê vayî şîyî Kerkûk. Her kesî dî, Ranyayî dî, Silêmanîyeyî dî. Bi beyraq û çekanê xo nêşî û DAIŞ nêvindarnayî? Mîyanê nê rastîyan de tesdîqkerdişê hêrişanê dewleta tirkî, xusûsen zî tesdîqkerdişê hêrişanê hemverê Têgêrayîşê Azadîya kurdan tirêm Kurdîtîye rê yeno?
‘Nêçîrvan Barzanî dişmenan nê la înanê ke mucadele kenê keno mazeret’
Ma wazenê çîyêk biyarê ziwan; Nêçîrvan Barzanîyî hêrişê verê çend rojan de PKK sey mazeret ramot. Gama ke Seddamî bi desan serran kurdan ser o bomba varnaye, ê PDK mazeret nêmotêne ra, şima mazeret nêmotên ra? Vakurê Kurdistanî de zî bombayan varnena, PKK sey mazeret ramojnena. Dişmenê kurdan estbîyayîşê kurdan qebûl nêkeno, loma do bi nê hawayî qisey bikero. Şerm o. Hemverê nê qirkerdişan de, hemverê nê hêrişan de herinda ke tewirêk hemverê dişmenanê kurdan bêro ramotene, mucadelekerdoxan sey mazeret ramojnenê. No çî şerm o. Ganî şaro kurd nê bivîno û hemverê nizdbîyayîşanê winayênan de tewir ramojno.”
‘Xîyanet do bêro cezakerdene’
Endamê Konseya Rayberdişî ya KCKyî Karasûyî vat ke Şeladizê de senî ruhê serewedartişî şar werişt payan ser, hemverê na îşxalkarîye zî ganî bi heman ruhî hurzê payan ser û hemra Helmetî rê wayîr vejîyo. Karasûyî peynîya qiseykerdişê xo de va: “Heman wextî de ma reyna înanê ke dewleta tirkî rê ajanîye kenê hîşyar kenê. Na dişmenîya hemverê kurdan a, sûcêko giran o. Ma do hendî giranîye bidê înan ser. Înanê ke no sûc kerdo do bêrê cezakerdene, wa dima ra çew nêvajo çira wina bi. Înanê ke hende sûco giran kerdo bêguman sûcê şerî kerdo. Xîyanet o, do bêro cezakerdene. Ganî çew Kurdistan de seba pereyan, yan zî çîyêna dişmenîya kurdan nêkero, daxilê sûcanê winayênan nêbo. Tu hêzo sîyasî zî ganî hemkarî û ajanîya bi nê hawayî meşrû nêvîno.”
Karasûyî vat ke seba vîrameyîşê Dîyar Xerîbî do Kurdistano azad û Rojakewtena Mîyanêne ya demokratîke biafernê. BEHDÎNAN
