Polîsê ke hêrişê çalakîya ‘Şer nê, bi sîyasetê Demokratîkî Çareserîye rê e’ ya Amedî kerd, parlementera HDPyî Dersîm Dage û di şêwirmendî destbend kerdî û dayî parlementere Salîha Aydenîze ro
Meclîsê Ciwanan ê Partîya Demokratîke ya Şaran (HDP) yê Amedî waşt saete 18: 00 de bi slogana ‘Şer nê, bi sîyasetê Demokratîkî Çareserîye rê e’ vernîya organîzasyonê HDPyî yê Peyasî de rayraşîyayîşêk bikero. Verê rayraşîyayîşî endam û îdarekarê HDPyî, parlementerî û bi seyan hemwelatijî Parkê Roboskê de ameyî pêser. Bi seyan polîsanê hêzê çewîkî dorê kîtle girewt û destûr nêda rayraşîyayîşî.
Vero ke rayraşîyayîş dest pê bikero, parlementera HDPyî ya Amedî Dersîm Daga ke waşt tewrê rayraşîyayîşî bibo vernîya aye amî girewtene. Polîsan bi zorî a esparê wesayîtê polîsan kerde. Dage derheqê halê xo de serê Twîtterî ra hayîdarî daye û vat ke nika polîsî aye esparê wesayîtê polîsan kenê û di şêwirmendê aye destbend kerdê. Dage vat polîsî destûr nêdanê ke aye wesayîtî ra peya bibo.
Dimayo ke polîsan waşt Dage û şêwirmendanê aye destbend bikerê, parlementera HDPyî Salîha Aydenîze reaksîyon da û polîso ke yeno vatene amirê Şaxê TEMî yo da Aydenîze ro. Naye ser parlementere Salîha Aydenîze, Mûsa Farisogûllari, Semra Guzele û Remzîye Tosûne serê rayîrî de çalakîya roniştişî viraşte. Dimayo ke Dage û şêwirmendê aye ameyî veradayene şîyî awanîya partîye û eşkerayî daye. AMED
