PSAKDyî derheqê tepiştişanê Meletî de eşkerayîyêk daye û bale ante serê polîtîkaya hêrişkare yê dewlete ya vera elewîyan
Hemsereka Şûbeyê Meletî ya Komeleya Kulturî ya Pîr Sultan Abdalî (PSAKD) Latîfe Ûlûtaşe, hemserê ci Îbrahîm Ûlûtaş û Hasan Kaya rîyê falîyetanê Komeleya Paştdayîşî ya Cimatkî ya ke bi Qerarnameyê Hukmê Qanûnî (KHK) ameyebî qefilnayene û parekerdişanê medyaya sosyale ameyî tepiştene. Endamê komele Orhan Sever zî seba îfadeyî ame vengdayene. Şûbeyê Meletî yê Komeleya Pîr Sultan Abdalî (PSAKD) derheqê babete de eşkerayîyêk da û bale ant hêrişanê vera elewîyan ser.
Komeleya Heqê Merdiman (ÎHD), Partîya Kede (EMEP), Partîya Sosyalîstanê Bindeste (ESP), Partîya Demokrasîya Azadîwaştoxe (ODP), Partîya Komînîste ya Kurdistanî (KKP) û xeylî hemwalatijanê elewîyan zî paştî daye eşkerayîye. Metnê çapamenîyo ke hetê endamê merkezê PSAKDyî Mehmet Topalî ra ame wendene de ca dîya nînan:
Elewîyan heta ewro çok nêda do ewro ra tepîya zî nêdê
“Operasyono ke vera endamanê ma ameyo kerdene leteyêkê polîtîkaya zextî ya vera wlewîyan o. Bi sebebo ke rêxistina ma sereberz a timûtûm hedefê îqtîdarî da ya. Heta ewro xeylî îdarekar û endamê ma ameyî destbendkerdene û tepiştene. Yeno famkerdeneke Meletî de vera rêxistina ma polîtîkayêka hêrişkare ya taybete ya îqtîdarî esta. Cuwa ver zî îdarekar û endamê ma bîlaheq ameyî girewtene. Ewro zî reyna hermsereka şûbeyê ma Lafîfe Ûlûtaşe û endamê ma bîlasebeb ameyî tepiştene.
Rixmê heme zext û qirkerdişan do mucadeleyê ma dewam bikero
Ma zaf hol zanê ke embazê ma bi sebebo ke elewî û çepgêr ê û cayê bindestan de ca genê ameyî destbendkerdene. Eşkerayo ke bi nê hêrişan hesabê asîmîlekerdişî yenê kerdene. La nê hesabê leymin ê serdestan do nêtepişê. Ma elewîyî bi serran o rixmê heme zext û qirkerdişan heta ewro ameyî. Ma rayîrê xo yo raşt nêbedilna. Ma verê zilmî de milê xo çewt nêkerd û vera nêheqîye bêveng nêmendî. Ma sey Pîr Sultan Abdalî heta ewro senî vera zextan çok nêda do ewro ra tepîya zî nêdê û mucadeleyê xo rê dewam bikerê. Bedelê ci çi beno wa bibo ma do rayîrê xo rê dewam bikerê. Vera zilmî milê xo çewt nêkerê û çirey teslîm nêbê.” MELETÎ
