Hevşaredarên HDP’ê yên Şaredariya Bajarê Mezin a Wanê piştî ku şaredarî ji qeyûm girt, dest bi sererastkirina wêraniya ku qeyûm li pey xwe hiştî kir. Hevşaredar Bedîa Ozgokçe Ertan têkildarî mijarê wiha got: “Em ê hemû saziyên ku qeyûm girtin, careke din hîn bi xurtir vekin. Başkirina şert û mercên jiyanê ya civakê, erka şaredariyê ye.”
Qeyûmê Şaredariya Bajarê Mezin a Wanê piştî ku hatibû tayînkirin, hema hema hemû saziyên jin, zarok, çand û hunerê girtin. Piştî ku Partiya Demokratîk a Gelan (HDP) şaredarî bi dest xist, kete nava hewldanan ku saziyên hatine girtin careke din veke. Têkildarî mijarê hevşaredara Şaredariya Bajarê Mezin a Wanê Bedîa Ozgokçe Ertan axivî û diyar kir ku wan ji bo sererastkirina wêraniya ku qeyûm li pey xwe hiştî, zend û bend badane.
Bedî Ozgokçe Ertan tayînkirina qeyûman weke derba li dijî vîna gel pênase kir û wiha dom kir: “Ev êrîş divê tenê weke binpêkirina mafê bijartin û hilbijartinê neyê dîtin. Êrîşeke li dijî temamiya qadên jiyanê ye. Qeyûman hemû nirxên civakê hedef girtin û saziyên jinan, çand, huner û zarokan girtin. Têkoşîna li dijî tundiya li ser jinê, erka şaredariyane. Her wiha vekirina krêşan, pêkanîna daxwazên civakê û peydakirina derfetan peywira şaredariyê ye. Karê şaredariyê tenê çêkirina rê û kanalîzasyonan nîne. Divê ji bo başkirina şert û mercên civakê jî bibe mekanîzmayeke diyarker.”
‘Em ê saziyên xwe hîn xurtir bikin’
Ertan di berdewamê de jî daxuyand ku dê hemû saziyên ku hatine girtin careke din vebikin û wiha pê de çû: “Mînak; Navenda Çandê ya Nûdayê hatibû girtin. Em ê di nava hefteyekê de avahiyê biselihînin û vekin. Em ê Mala Hêwirandinê ya Jinê jî vekin. Jixwe Serokatiya Daîreya Polîtîkayên Jinan ku qeyûm girtibû, me vekir. Em ê saziyan xwe hîn xurtir bikin.”
Li gorî pêdiviyan atolye tên vekirin
Di dawiyê de jî Bedîa Ozgokçe Ertan ev tişt anî ziman: “Bi vekirina Navenda Jiyanê ya Jinê re gelek kesan serî lê da. Ev serlêdan hem ji bo tundiyê û hem jî ji bo vekirina qursane. Êdî em ê li gorî pêdiviyê atolyeyan vekin. Di hêla îstîhdamkirin û qada tenduristiyê de jî em ê xebatên xwe xurtir bikin. Em ê ‘JIN Kart’ê derxînîn. JIN Kart ne tenê ji bo veguhestinê, dê di her aliyên jiyanê de jin bikarin bi vê kartê ji xizmetên şaredariyê sûd wergirin. Armanca me ew e ku jin bibin xwedî derfetên avakirina jiyaneke ku xwe tê de dibînin û hîs dikin.” WAN
