Li gorî televîzyona Îsraîlê heyeteke îranî û rayedarên amerîkî li bajarê Hewlêrê yê başûrê Kurdistanê hevdîtin kirine
Li gorî malpera înternetê ya qenala Î24 neviyê lîderê olî yê Îranê Alî Hamaney û rayedarên amerîkî 5’ê tîrmehê li oteleke li Hewlêrê hevdîtin kirin.
Li gorî nûçeyê ku agahiyên xwe dispêre çavkaniyekî nepen heyetek ji rayedarên Erebistana Siûdî jî li heman otelê bûn, lê belê ji bo ne li devera hevdîtinan bin cihê wan hate guhertin.
Hate îdîakirin ku heyeta îranî ji neviyê Hamaney Hasan Hameney, du endamên Mûxafizên Şoreşê û wezîfedarê Îranê yê li Iraqê Irac Mescîdî pêk dihat. Hate ragihandin ku der barê encamên hevdîtinê de agahî nehatine wergirtin.
Li gorî heman çavkaniya nûçeyan gelek rayedarên Îranî ji rejîmê dûr ketine, ji wezîfeyê hatine dûrxistin an jî bêyî daxuyaniyekê bidin ji holê winda bûne. Di nava yên winda bûne de general Alî Nasirî jî heye. General Golam Huseyîn Geyb Pervar jî ji wezîfeyê hate dûrxistin û hate girtin.
Hate îdîakirin ku yek ji şefên berê yên servîsa îstîxbaratê ya Wezareta Parastinê Seyîd Asker Mîr Caferî hefteya derbasbûyî li başûrê Îranê ji aliyê endamên îstîxbarata Mûxafizên Şoreşê ve hatiye girtin. AMED
