Endama DÎKî Hatîce Kavrane dîyar kerde ke operasyonê fuhûşî û şantajî yê ke Çewlîgî de pê ame de kesê ke ameyî tepiştene ra kesê ke nizdîyê îqtîdarîyî zî estbî û çîyê ke yenî cuyayene pabesteyê îqtîdarî yî û va: “Kesê keno gure kenî mecburê ke hêzê xo cayêk ra bigîrî. Şarê Çewlîgî wazeno kesê berpirsîyar hesab bidî.”
Çewlîg de 25ê hezîrane de polîsan bi hawayêkê hemwext eştbî xeylî adresan ser. Opreasyono ke vera Çeteyê Fuhûşî ame viraştene de 31 kesî ameyî tepiştene. Ame vatene ke ê ke ameyî tepiştene mîyanê înan de hetkarê Serekê Şaredarîya Çewlîgî yê AKPyî Mûhîttîn Bûkan, polîs Ersîn Yildiz, qoricî Ahmet Varan, Mehmet Tekgoçeno ke rîyê hîzbûlahî ra wextêk zîndan de mendebi, endamê AKP û MHPyî ya pîya xeylî kesê ke dezgehanê fermîyan de xebityenê estbî. 31 kesê ke operasyon de ameyî tepiştene 29ê hezîrane de sewqê edlîye bibî. Tepişteneyan ra 10 kesî ameyîbî tepiştene, 15 kesî bi şertê kontrolê edlîyî ameyîbî veradayene. 21 kesî zî serbest veradîyayîbî. Derheqê dosyaya tehqîqatî de zî qerarê nimtişî amebi girewtene.
Goreyê malumatanê ke rayapêroyî de vejîyayî, no çete 2016î ra nata esto û her çiqas ke bêro zanayeke ke mîyanê Çeteyê Fuhûşî ke kamî kesî estî zî derheqê înan de tu tehqîqat nêdîyayo dest pêkerdene. Ame zanayene ke keyeyê kesê ke ameyî tepiştene de bombeyê destan û çekî zî estbî.
Derheqê babete de Endama Kongreya Îslamê Demokratîke (DÎK) Hatîce Kavrane qisey kerde û dîyar kerde ke ganî berpirsîyar hesab bidî şar.
‘Berpirsîyar ameyî pawitene’
Kavrane destpêkê qiseykerdişê xo de daye zanayene ke operasyonê fuhûşî rojeva Çewlîgî de ronişto û no hedîse problemêko edlî ra vîşêr operasyonêko xo paweno sînorê komelî û hedîseyêko bêehlaqî yo û va: “No çete 2016î ra nata esto. Her çiqas ke bêro zanayene kemîyanê çeteyî de kamî kesî estî zî derheqê înan de tu tehqîqat nêdîyayo dest pêkerdene. Çend serrî yo ke kargeh de bazarîya fuhûşî yeno kerdene û her çiqas ke garsonê kargehî vîdeoyan dabî emnîyet zî tu çîyêk nêame kerdene û garson kar ra ame eştene. Rewşa fuhûş, tehdîd û şantajê şexsî nîya. Heta nika berpirsiyar ameyi pawıtene.”
‘Hêzê xo dewlete ra herînenî’
Kavrane tewr peynî înan va: “Kesê ke ameyî tepiştene ra kesê ke nizdîyê îqtîdarîyî zî estbî û çîyê ke yenî cuyayene pabesteyê îqtîdarî yî. Kesê ke ameyî tepiştene eynî fikrê sîyasî de yî. No hedîse problemêko sîyasî ra vîşêr problemêko ehlaqî yo. Çewlîg de çeteyêko winasî vejîya. No tesaduf nîyo. Hedîse hêzê îqtîdarîya cîya nîyo. Hedîseyo ke ame cuyayene hêrişê vera komel, bawerî û erjanê kulturî merdimîye yo. Şarê Çewlîgî wazeno kesê berpirsîyar hesab bidî.” ÇEWLÎG
