Gelek welatiyên ji eşîra Surçî çûn serdana çalakgerên Mertalên Zindî ku ev 24 roj in dijî dagirkeriya dewleta tirk di çalakiyê de ne û piştgiriya xwe anîn ziman
Çalakiya Mertalên Zindî ku ji aliyê Tevgera Ciwanên Welatparêz û Jinên Ciwan ên Têkoşer ve li dijî dagirkeriya dewleta tirk a li ser axa başûrê Kurdistanê hatiye destpêkirin di roja 24’an de bi desteka gelê herêmê didome.
Di çarçoveya van piştgiriyan de jî gelek endamên Eşîra Surçî çûn serdana Mertalên Zindî û piştgirî dan. Mertalên zindî jî ji ber desteka wan spasiyên xwe pêşkêşî mezinên eşîrê kirin.
Di dawiya serdanê de daxuyaniyek hate xwendin. Di daxuyaniyê de bang li hikûmeta Herêma Kurdistanê û Hikûmeta Iraqê hate kirin ku destûr nedin êrîşên dagirker ên rejîma tirk û her wiha di daxuyaniyê de êrîşên rejîma Îranê yên bi tank û topan jî bi tundî hatin şermezarkirin.
Di daxuyaniyê de bal hat kişandin ku hebûna hêzên gerîla ji bo welatiyên herêmê gelekî girîng e û wiha hat gotin: “Ger gerîla nebe, dê çeteyên wekî DAIŞ û artêşa tirk a dagirker axa başûrê Kurdistanê talan bikin.”
Her wiha daxuyanî bi dirûşmeyên ‘Bijî kurd û Kurdistan’ û ‘Bimire dagirkerî’ bi dawî bû. BIRADOST
