Qezaya Pulurî ya Dêrsimî de 15ê temmuze de way û birayê yewbînan Ayaz û Nupelda Gulogluye netîceyê teqayîşê mayîno ramitene de cuya xo vindî kerdbî. Goreyê Wezîrîya Karê Zerre mabenê serranê 1984 û 2009î de muhîmatanê teqayîşî vera hezar û 269 kesî cuya xo vindî kerdî û 5 hezar û 91 kesî zî birîndar bîyî. Goreyê Hewldayîşê Tirkîyayêka Bê Mayînî zî Tirkîye de 1 mîlyon mayînê ramitene estî
Mezraya Çakliyayla ya dewa Bîlgeçî ya qezaya Pulurî ya Dêrsimî de 15ê temmuze de way û birayê yewbînan Ayaz (8) û Nupelda Gulogluye (4) netîceyê teqayîşê mayîno ramitene de cuya xo vindî kerdbî. Walîtîya Dêrsimî derheqê teqayîşî de eşkerayî dabî û îdîa kerdbî ke teqayîş rîyê teqemenîyêk ke hetê endamanê organîzasyonî ra herême de verê cû ameyo ronayene virazîya yo. Labelê badê cigêrayîşanê cayê hedîse ame vatene ke teqayîş rîyê muhîmatêko eskerî vera virazîya yo. Eşkerayîya Walîyê Dêrsimî Tuncay Sonerî bî sebebê reaksîyonê keye û şarê Dêrsimî. Keyeyê Guloglu no 3 serrî yo şono wareyan û aşmanê hamnanî wareyan de derbaz keno. Teqayîş 15 metre dûrê çadirê keye de pê ame. Şopê teqayîşî persan sereyê merdiman de virazenî. Teqayîş qet çal ya zî kotran nêviraşto. Cok ra wina aseno ke teqayîş bi teqemenîyo ke bi destan ameyo viraştene ra nêbîyo. Teqayîş nizdîyê Qereqolê Kuşluca de pê ame û şikî zêdîyenî.
Badê no hedîse reyna babetê muhîmatê teqayîşî û mayînî kewtî rojeva Tirkîya. Goreyê dayeyê Hewldayîşê Tirkîyayêka Bê Mayînî Tirkîye de 1 mîlyon mayînê ramitene estî. Reyna goreyê eynî dayeyan mabenê serranê 2004 û 2017î de hezar û 138 kesî muhîmatê eskerî û mayînanê ramitene vera cuya xo vindî kerdî. Tirkîya de 1 mîlyon û 3 hezar û 943 mayînê ameyî ramitene. Tewr zêde bajaranê Agirî, Êlih, Çewlîg, Dêrsim, Bedlîs, Amed, Dîlok, Colemêrg, Hatay, Îdir, Qers, Mêrdîn, Sêrt, Riha, Şirnex û Wanî de mayînê ramitene estî. Tirkîya de mabenê serranê 1991 û 1998î de sere de herêmanê sînorî û xeylê cayanê nizdîyê sînorî de mayînî ameyî ramitene. Tirkîya 4ê kanûna 1997î de qerar dayeke Pêkerdişê Ottawa ke berardiş û ramitişê mayînan qedexe yo, îmze bikera. 1ê Adara 1999î de qerar kewt merhela. Tirkîye serra 2003î de pêkerdiş îmze kerde. 1ê Adara 2004î de qerar kert dewre. Goreyê pêkerdişî ganî Tirkîye 2008î de 3 mîlyon mayînan îmhabikerda. Labelê 2011î de mayînê ke ameybî stokkerdene nêameyî îmhakerdene. Tirkîye şertê pêkerdişê bicaa naêrde û heta 2022î wextê aye esto. DÊRSIM
