Merkezê Pêroyî yê Komeleya Kulturê Pîr Sultan Abdalî (PSAKD) eşkerayîyêka nuştekî da û eşkerayîya xo de reaksîyon nîşanê projeyê Lîseyê Îmam Hatipî yê Elewî da. Eşkerayî de veng dîya AKPyî ke kerdişê mîsyonerî ra fek vera bido
Komeleyê elewîyan reaksîyon nîşanê projeyê Lîseyê Îmam Hatipî yê Elewîyî ke sey Projeyê Anatolîya yê Haci Bektaş Velî yê Statuyê Taybetin zî yeno binamekerdene, danî. Merkezê Pêroyî yê Komeleya Kulturê Pîr Sultan Abdalî (PSAKD) eşkerayîyêka nuştekî da û eşkerayîya xo de reaksîyon nîşanê projeyê Lîseyê Îmam Hatipî yê Elewî da. Eşkerayî de ame vatene ke goreyê îqtîdarê AKPyî her kes sunnî û tirk o.
Eşkerayîya PSAKDî winayo: “Kismêko zêde yê welatî hetê tarîkatan ra yeno îdarekerdene. Her kuçeyêk de kursê Qur’anî yenî akerdene. Her firsendî de cinî sey sinifê 2. yena îfadekerdene. Komeleya ke Halkali yê Stenbolî de xo sey Weqfê Kultur, Perwerdeyî û Piştîdayîşî yê Dostelî dana şinasnayene , tewrê AKPyijan xebatanê akerdişêmektebî de ca gêna. Hurmet nîşanê bawerîya bi mîlyonan kesanê ke welat de cuyenî nêdîyeno. Goreyê AKPyî her kes sunnî û tirk o. Seke her 50 metreyî de camîyêk û dersê mecburî yê dinî ke mekteban de dîyenî, bes nîyo, nika zî Stenbol de Îmam Hatipê Elewîyan abeno. Hewl dîyeno ke elewîyan kokê înan ra biqerifnî û bawerîya elewîyan çin bikerî. Şarêk ser de ferzkerdişê bawerî suc o. Na rewşe bi çekuya tewr şenik mîsyonerî ya. Wa AKPyî mîsyonerî ra fek vera bido. Tarîx ra nata ma vera mîsyonerî û îxanetî de çonk nêrona û ewro zî nêronenî. Ma do destûr nêdî Îmam Hatipê Elewîyan.” ANQARA
