33 ciwanê ke qezaya Pirsusî ya Riha de hêrişêko bombeyîn de ameybî qetilkerdene Dêrsim de ameyî vîrardene
3 serrî verê 20ê temmuza 2015î de qezaya Pirsusî ya Riha de hêrişêko bombeyîn ameybî kerdene û netîceyê hêrişî de 33 endamê Federasyonê Komeleyê Ciwananê Sosyalîstan (SGDF) ameybî qetil kerdene û 100 ra zêdeyêr kesî zî birîndar bîyî. Vizêr serrgêra 4. ya qetlîyamî bî û kesê ke qetlîyam de cuya xo vindî kerdbî Raşteyê Seyîd Riza yê Dêrsimî de ameyî vîrardene.
Xeylê partîyê sîyasî, temsîlkarê STO, Parlementerê HDPyî yê Stebolî Dilşat Canbaz û xeylê hemwelatijî tewrê vîrardişî bîyî û fotografê kesê ke cuya xo vindî kerdî wedarnayî. Raşteyê Seyîd Rizayî de çila û findî ameyî tafînayene û oyuncaxî ronîyayî raşte. Vîrardiş de endamê SGDFyî Cengiz Fidanî qisey kerd û dîyar kerd ke ê mîrasê 33 rayvanan dewr girewtî.
Dima ra Parlementerê HDPyî yê Stebolî Dilşat Canbazî qisey kerd û va: “Qatil û kerdoxî kuçeyan de gêrenî. Ma hema zî pey edaletî de gêrenî. Ma do kesêke qetlîyam pê ardî xo vîra nêkerî. Ma do xeyalê 33 ciwanan nîmcet vera nêdî.
Tewr peynî Serekê Şûbeyê Dêrsimî yê ÎHDyî Gurbuz Solmazî qisey kerd û dîyar kerdî ke berpirsîyar AKP yo. Keyeyê Çagdaş Aydinî ke qetlîyam de cuya xo vindî kerdbî zî Aydinî mezelê ci yê Dewa Guneykonakî ya qezaya Pulurî ya Dêrsimî ser de vîr ard. DÊRSIM
