Operasyonê fuhûşî yê Çewlîgî de, hetkaro verên ê şaredarê Çewlîkî yê AKPyî Mûhîttîn Bûkan ame destbendkerdene. Ame îdîakerdene ke Bûkan serkêşê çeteyî yo. Bûkan şeş saetan ra dima serbest ame veradayene
Walîtîya Çewlîgî dabi zanayene ke operasyonê peyênî yo ke bajar de ame viraştene de 31 kesî ameyê destbendkerdene.
Bi sûcdarîya ‘bi bedelê pereyî zext merdiman ser o kerdo ke bikewê mîyanê têkilîya cinsî û şantaj kerdo’ nê kesî ameyî destbendkerdene. Rixmo ke eşkerayîya walîtîye de ame vatene, G.B. (Gulistan Bûlût) û F.K. (Fevzî Koslu) lîderê çeteyî yê, yeno vatene ke serçeteyo sereke hetkaro verên ê şaredarê AKP’yî Mûhîttîn Bûkan o. Lîste de tayê kesê ke bale ancenê çawişo ekspert Ersîn Yildiz, Ahmet Varano ke wextêko derg o qoricîtîye keno û Mehmet Tekgoçeno ke demê verî de dewaya Hîzbullahî ra zîndan de mendo.
Tayê çimeyanê Çewlîgî ke nêwaşt nameyê xo bidê vat ke Bûkano ke Çewlîg de mutehîtîye keno ronayoxê çeteyî yo. Heman çimeyan pêhesna ke Bûkano ke ameyo destbendkerdene 6 saetan ra dima bi şertê kontrolê edlîyî ameyo veradayene. Çimeyêkê bînî zî pêhesna ke asayîşî rew ra bi nê çeteyî zanayêne, labelê seba ke weçînitişî ser o tesîr nêkero bi tewirêkê sîyasîyî operasyon peyde eşto. Sebebê nê zî no yo ke endamê çeteyî endamê AKP û MHPyî yê. ÇEWLÎG
