Dêrsimijî seba ke di serran Festîvala Mûnzûrî ameye qedexekerdene û seba ke reyna nêra qedexekerdene programê aye qels ameye veradayene reaksîyonanê xo ardî ziwan ser û vatî: “Na festîvale nêbena cewabê çîyê ke ma cuyenî.”
19. Festîvala Kultur û Xoza ya Mûnzûrî ya ke emser bi şîarê ‘Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!’ yena viraştene do heta 28ê aşme dewam bikera. Ewro roja diyîn ya festîvale ya. Festîvale serra 1999î ra heta yena viraştene û bi coşê xo yena nasnayene. Walîtîya Dêrsimî di serrî pêser festîvale bi mehneya ‘asayîşî’ qedexe kerde. Badê di serran emserr destûr dîya ke festîvale bêra viraştene. Goreyê serranê verênan qelsîya programê emserrî bale ancena. Hemweltijê Dêrsimî dîyar kerdî ke sebebê kêmasîyê emserrî yê festîvale polîtîkayê şerê taybet yê serê Dêrsimî de yeno meşnayene yo.
Polîtîkayanê şer vera festîvale nêba cewabê persan
Îrfan Babayigîtî da zanayene ke festîvale manayin û muhim a û va: “Na festîvale wazena ke ma kulturê xo hîna zêde bidî nasnayene. Serranê 90. De xeylê dewê ma ameyî vengkerdene. Nika zî dew û herêmî binê nameyê asayîşî de ameyî qedexekerdene. Ma Dêrsim de xo sey qutiyêko padaye de hîs kenî. Çend serrîyo ke Dêrsim binê şerêko giran de yo. Polîtîkayanê şer vera mavînenê ke do festîvale nêba cewabê persan. Ez programê festîvale goreyê waştişanê şarî nêvînena. Tesîrê walî zêde yo.”
Programê emserrî goreyê waştişê dewlete ameyo amadekerdene
Dîlan Dîlsîze dîyar kerde ke festîvalê verênan de hîna zêde coş û kelecan estbî û va: “Mi kelecan û coşê serranê verênan emserrî de nêdî. Ganî tewrbîyayîş hîna zêde bibo. Di serrî yo ke festîvale yena qedexekerdene. Ma binê zextan de yî. Kesê ke tewrê festîvale benî bi fikarin î. Programê emserrî goreyê waştişê dewlete ameyo amadekerdene.”
Ganî şar wayîrê festîvale bivejîyo
Riza Bîlîro ke Stenbolî ra tewrê festîvale bîyo zî va: “Amacê festîvale reaksîyon nîşandayîşê vera viraştişê awbendan o. Festîvala emserrî bi zor û zehmetîyan ameye amadekerdene. Vera heme çîyan de başo ke reynaameye viraştene. Ma herêma xo de şer nêwazenî. Ganî şar wayîrê festîvale bivejîyo.”
Ganî heme çî ra ver çareserîyêko daîmî pê bêro
Guler Kaplana ke Mêrsîn ra tewrê festîvale bîya zî dîyar kerde ke aye tewrê heme festîvalan bîya û wina va: “Mi festîvala emserrî de coş û kelecanê serranê verênan nêvîna. Zaf bêveng derbaz bena. Helet sebebê na rewşe estî. Ganî heme çî ra ver çareserîyêko daîmî pê bêro.” DÊRSIM
