Panelo ke do Çarçewaya Festîvala Kultur û Xoza ya Mûnzûrî de Salona Konferansî ya Şaredarîya Dêrsimî de biameyêne viraştene, seba ke polîsan qeydê kamera girewt ame betalkerdene û Sanat Sokagi (Kuçeyê Hunerî) rê ame hewilnayene
19. Festîvala Kultur û Xoza ya Mûnzûrî ya roja dîyine de zî rastê qedexe, astengî û tacîzê polîsan amî. Dimayo ke belgefîlmê bi nameyê ‘Mayê Şemeyî’ û aktîvîteya Atolyeya Kavramî ya LGBTyî hetê walîtîye ra ameyî qedexekerdene, panelêk ke bi tewrbîyayîşê sîyasetmedaran ame waştene zî rastê tacîzê polîsan ame.
Temel: Ma zordarîya kamera qebul nêkenê
Gama ke pîya bi endamanê çapemenî û temaşekaran qiseykerdoxan zî salone de cayê xo girewt, tam panel dest pêkerdêne polîsê ke zere de bî dest bi girewtişê qeydê kamera kerd. Parlamenterê HDPyî Tayyîp Temelo ke hemverê polîsanê ke antişê dîmenan kerdêne reaksîyon da va: “Ma nê qebul nêkenê, ma nika salonêka girewtî de kombîyayîşê salone kenê. Eke no kerdişê polîsan nêvindero ma do panelî Sanat Sokagi de virazê.”
La rixmê nê hîşyarîya Temelî de zî polîsan peynî ro antişî neared, naye ser ame vatene ke do panel Sanat Sokagi de bêro viraştene. Dimayê pêhesnayîşo ke ame kerdene ra panelîst û temaşekaran bi çepik û tîlîlîyan hemverê bicaardişî de reaksîyon da û şîyî Sanat Sokagi. DÊRSIM
