Şaxa ÎHD’ê ya Îzmirê, di çalakiya îro de bal kişandin ser kuştina Nûçegîhanê Rojnameya Ozgur Gundemê Ferhat Tepe yê di 28’ê Tîrmeha 1993’an de hat revandin û bi îşkenceyê hat kuştin. ÎHD’ê xwest kujerê Tepe bên darizandin.
Komîsyona windayan a Şaxa Komeleya Mafên Mirovan (ÎHD) ya Îzmirê bi diruşmeya “Bila winda bên dîtin û kujer bên darizandin,” li pêş Sumerbank a Berê ya Konaka Îzmirê çalakiya xwe berdewam kirin. Parazvanên mafên mirovan û xizmên windayan pankarta “Winda diyar in, faîl li ku ne?” vekirin. Di çalakiyê de Nûnerên HDK, ESP û HDP’ê û gelek nûnerên rêxistinên civakî amade bûn. Parazvanên mafên mirovan vê hefteyê bal kişandin ser kuştina Rojnameger û Nûçegîhanê Rojnameya Ozgur Gundemê Ferhat Tepe yê di 28’ê Tîrmeha 1993’an de hat kuştin. Nûnerên ÎHD’ê xwestin kujer bên dîtin û darizandin.
Rêveberê ÎHD’ê Caner Canli, diyar kir ku bi salan e aqûbeta windayan dipirsin û ji bo faîl bên darizandin têdikoşin. Canli, anî ziman ku Tepe di 28’ê Tîrmeha 1993’an de li Navenda Bedlîsê ji aliyê kesên bi çek û bêtêl ku wekî polîsên sivîl dihatin zanîn hat revandin û wiha got: “Piştî 3 kesên çekdar Ferhat Tepe Revandin bi telefonê li Serokê DEP’ê yê Bedlisê Îshak Tepe geriyan û xwestin li hemberî Ferhat Rêxistina DEP’ê ya Bedlisê bigirin an jî pere bidin. Îshak Tepe, anî ziman ku tengê kesê li ser telefonê dişibiya Gerenal û Fermandarê Tuyaya Zirxî ya 6’emîn a Tetwanê Korkmaz Tagma. Malbata Tepe piştre serî li Şaxa Asayişê ya Bedlisê, Midûriyeta Polîsan a Bedlisê, Walîtî û Serdozgeriyê dan. Dîsa serî li Wezîrê Karên Hundir û Waliyê OHAL’ê dan û xwestin kurê wan bê dîtin. Lê bi israr binçavkirina Ferhat înkar kirin. 13 roj şûnde cenazeyê Ferhat Tepe ku rastî îşkenceya giran hatibû, li Goristana Bêkesan a Xarpetê hat dîtin.
DMME Tirkiye mahkûm kir
Canli, ani ziman ku piştî malbatê doz bir Dadgeha Mafên Mirovan a Ewropayê (AÎHM). Canli, anî ziman ku ji ber Tirkiye lêpirsîna pêwist nemeşand, DMME Tirkiye mahkûm kir.
Canlı, herî dawî destnîşan kir ku doz bê hiqûq bi sedema demboriye hat girtin û got “Ev yek nayê qebûlkirin.” îzmîr
