Cendirmeyan destûr nedan ku Endamên Meclisa Ciwanan a HDP’ê li dijî talankirina Heskîfê “Nobeta Çadirê” bigirin
Meclisa Ciwanan a HDP’ê, li dijî talankirin û wêrankirina Heskifê, xwestin Nobeta Çadirê bigirin. Lê cendirmeyan destûr nedan ku ciwan çalakiya “Nobeta Çadiran” bigirin. Çend saet beriya ku ciwan bên li GunDê Kesmekopru tenişta Çemê Dîcleyê kom bibin û “Nobeta Çadiran” bigirin esker hatin li qadê kom bûn û qad xistin bin dorpêçê. Dîsa esker û polîsan Terasa Seyranê ya Heskifê jî dorpêç kir.
Di ketina navçeya Heskifê de maşineyên parlamenterên HDP’ê Feleknas Uca, Ayşe Acar Başaran û Mehmet Ruştu Tiryakî di lêgerînek dijwar de derbas kirin. Maşîneyên ku endamên meclîsa ciwanan a HDP’ê jî lê suyar bûbûn gelek caran hatin rawestandin û di lêgerînê re derbas bûn. Mayîneyek jî bi sedema li dervê xetê dixebite girêdan.
Piştî parlamenter ketin navberê maşîne dîsa dan xwediyê wê. Endamên Meclisa Ciwanan piştî yek bi yek di GBT’ê re derbas bûn, ketin navçeya Heskîfê. Ciwan piştre derbasî tenişta Çemê Dîcleyê bûn. Ciwan piştî bi tevlêbûna muzîkjenên Navenda Çanda Baharê dest bi şahiyê kirin, polîs û esker hatin û ciwan asteng kirin. Esker û polîs hatin qadê û diyar kirin ku çalakî li dijî qanûnê ye û destûr nedan ku Ciwan çalakiya “nobeta çadirê” li dar bixin.
Wekîlê HDP’ê Mehmet Ruştu Tiryakî xwest bi rayedarên polîsan re muzakere bike. Lê esker cop li mertalên xwe xistin û ciwan sor kirin. Piştî astengiya esker û polîsan ciwan bêyî dest bi nobetê bikin çalakî bi dawî kirin. ÊLIH
