Citkarê bi nameyê Mehmet Haci Sûlarî vat ke polîtîkayê hukmatê AKPyî yê serê citkarîye bîyê sebeb ke citkarî îflas bikerê û vat ke dermanê sexteyî yê zîretî yenê rotene û hemverê na yewe tu kes hetkarîya citkaran nêkeno
Baxçeyê Hewselî yê ke bi hezaran serran o seba Amedî bîyê baxçeyî berdayîşî, 4ê temmuza 2015î de kewtîbî Lîsteya Mîrasê Kulturî yê Dinya yê UNESCOyî. Hîrayîya Baxçeyanê Hewselî 700 hektar o. Baxçeyê Hewselî bi xasekî û beranê xo bala dinya anta xo ser.
Citkarê Baxçeyê hewselî serd û germî de kede danê û ci pawenê. Citkaran ra yewo ke bi serran o kede dano Baxçeyanê Hewselî zî Mehmet Haci Sûlar o. Sûlar 15 serrîya xo ra nata mîyanê Baxçeyê Hewselî de kede dano û nika rîyê polîtîkayanê hukmatî ra derheqê citkarîye de gerreyan keno. Sûlar vano seba hetkarîye ê muracatê Wezaretê Citkarîye kerdo û Wezaretî ê ra vato ma nêeşkenê tu hetkarî bidê to. Sûlarî wina qisey kerd: “Mazeretê Wezaretê Citkarîye o yo ke hêgayê mi 15 pale yo û seba mi vat ma çi hetkarîye bidê to. Tinazê xo bi mi kerdî. Ez peyde ameya açarnayene. Mi kaxidê xo eştî serê înan û mi vat nê çi qanûnê Erdoganî yê? Mi ra vat tu heqaret serekkomarî rê kenê, no qanûno tewr rind o seba citkaran. Hêgayê mi seba ramitişî hêgayêko biber o. polîtîkayê hukmatê AKPyî Hewsel de citkarîye kişta û Hewsel de çew nêeşkeno citkarîye bikero.”
‘Çew seba citkaran nêbeno hetkar’
Sûlarî ard ziwan ke dimayo ke Sûr ame xirakerdene hendî muşterîyê înan heme vila bîyî û wina dewam kerd: “Ez Baxçeyê Hewselî de firingî, îsot, xîyar û kuwan karena. Heme mêwe û sebzeyê ke ma tîya karenê xozayî yê. Berê baxçeyanê Hewselî eleqeyêko pîl dî. La nika seba ke qeza amî xirakerdene û talkerdene hendî muşteyê ke ez mehsulanê xo biroşî çinê. Dimayo ke xeylî mehlayê Sûrî ameyî xirakerdene ma hendî bazarê rotişî nêvînenê. Ma problemê xo bi desan reyan selahîyetdaran ra vatî, rixmê nê de çew ma citkaran rê nêbi hetkar.”
‘Sebze seba werê ma zî nêvejêno’
Sûlarî ard ziwan ke firingîyê hendî baxçeyan de vero ke bibê sûr xerepênê û wina dewam kerd: “Baxçe de vero ke sebze virazîyo xerepêna. Heme dermanê zîretî yê ke roşîyenê sexte yê. Ma herînenê û erzenê mîyanê baxçeyî zî tu faydeyê înan çino. Verî debarîya Amedî û bajaranê dormeyî heme Baxçeyê Hewselî ra bîyêne. Hewsel depoyê sebzeyan ê Kurdistanî bi. La rîyê polîtîkayanê hukmatî yê serê citkarîye ra wayîrê hêgayan bi xo zî nêeşkenê werê xo bi xo zî baxçeyan ra vejê. Sey keye no se serrî yo ma Hewsel de yê. Ez Hewsel de bîya pîl û bîya kokim. Reya ewilêne ya ez çîyêko winayên vînena. Her kesî verê xo ma ra açarnayo û çew citkaran rê wayîr nêvejêno.” AMED
