Sedat Gorenço ke 19 serrî yê xo de kewt zîndan û 43 serrî yê xo de çarçeweya muhakemekerdişê DGMyî yê nêadilane ke do reyna bêro muhakemekerdene de ame tehlîyekerdene
Mehkemeya Qanûno Bingeyî (AYM) seba ke heyetê Mehkemaya Asayîşê Dewlete (DGM) de eskerê ke endam bîyî estbî û muhakemekerdiş bi adilane pê nêameyo de qerarê newera muhakemekerdişê hepsîyanê verênan daye. Çarçeweya muhakemekerdişî de Sedat Gorenço ke 19 serrî yê xo de kewt zîndan, 43 serrî yê xo de vejîya. Gorençî 19ê adara 1995î de DGMyî de ameybî muhakemekerdene û cezaya girankerde ya muebetî ci rê ameybî dayene. Gorençî dorbidor zîndananê Amed, Dîlok, Çewlîg û Çankiriyî de mend.
Muracatê Gorençî 14 aşmî verê seba AYMyî ameybî kerdene. Badê 14 aşman muracat ame ercnayene û qerarê serbest veradayîşî ame dayene.
Gorenç Zîndanê Tîpa Tyî yê Çankiriyî ra hetê keye û embazanê xo ra ame pêşwazîkerdene. AMED
