Eke ez biwazî binûsnî zî çirray nêeşkena bi nê çend çekûyanê xo yê sînordaran êşê cinî û tûtan, extîyar û ciwananê ke qirkerdiş ra derbas bîyê bidî îfadekerdişî. Bi des hezaran cinî tûtî û extyarî veyşan û teyşan mîyanê sîyan û telîyan, çal û kortikan ro bi payatî ver bi nedîyarî wa şîne. DAIŞ’î paştî kamî ra gêno û çend dewletî qiwet danê ci. Verê çimanê heme dinya de, verê çimanê heme dewletê serdestan de hetê nê cinawiran ra bazarê koleyan ameyî rûnayîşî û bi hezaran cinî û tûtê Êzdî ameyî rotiş û herînayîşî. Se serra vîst û yewine ke qaşo se serra têduştî û azadîyan a bî şahidê rotiş û girotişê cinî û tûtan a sey koleyan.
3’yê Tebaxa 2014’ine de Kurdê Êzdîyan ser de qirkerdişêke hovane ke bi destê cinawiranê DAIŞ’î pêk ame ke ma zanê kûklayêke yê hetê dewletanê eperyalîst, dagirker û mêtingeran ameyê viraştişî. Her çiqas raşte de sey fîgûranî DAIŞ bieyso zî qirkerdişê 73. ke na se serra vîst û yewine de şarê ma yê Êzdîyan ser de ame viraştişî de gişta zehftir netewdewletanê serdestan esta. Na rêxistina hov û cinawire xo bi werê netewdewletanê ke yenê zanayîşî kerdêne mird û bi sîlehanê înan qirkerdişê xo şarê ma yê Êzîdîyan ser de pêk ardêne. Dewletê emperyalîst, dagirker û mêtingerî zanê ke wexta Kurdî biarsê heqê xo û bi awayêke xoserî bibê wayîrê welatê xo karê înan etya qedêno û nêeşkenê dest bidê çimeyanê dewlemend ê ser edr û binerdan ê warê Kurdan.
Emperyalîst û dagirkerî wazenê Kurdî her tim bi qirkerdiş, talan û koçberî dir bixercelyê, azadî û heqanê xo yê însanî ra bêpar bimanê ke ey zî bieşkê dest bidê dewlemendîya sererd û binerdê înan ser. Bi nê mexsedê xo zî yan ey bi xo zext û zordarî talan û qirkerdiş kenê para şarê Kurdî yan zî bi rêxistinanê xo yê terorî ke awan kenê û verra danê Kurdan wazenê Kurdan binê kontrolê xo de bigîrê. Her merdimo/a ke bieşko bifikirîyo eşkeno/a na raştî zî bivîno.
Başûr de zî hedefê yewin ê DAIŞî destkewteyê şarê Kurdî bi, Rocawan de zî heta bi buyera 5’ê Hezîranî yê Amedî de zî, 20’ê Temûzî de Pirsûs de û 10 Citmenge de Enqere de zî DAIŞî bi înîsîyatîfê dewletê serdesatan nê qirkerdişê xo Kurdan ser de pêk ardê. Her wext zî hedefê nê Dewletê serdest û rêxistinanê sey DAIŞî de cinî estê û wazenê bi bindestkerdişê cinîyan îradeyê şarê Kurdî bişiknê la senîn ke înan Rocawan de derbeyo tewr pîl destê cinîya Kurde ra werd go bi têkoşîna cinîyan peynî ro hikmê heme netewedewletan û rêxistinanê înan ê terorî zî bêro ardişî. Wexta cinî her çar perçeyan de bi rêxistinî yewîtîya mîyanberê xo awan bikerê go bieşkê heme awayî dek û dolabanê nê dewletê dagirkeran û rêxistinanê înan ê hovan zî veng cevê. Awankerdişê yewîtî û têverardişê têkoşîna cinîyan go awankerdişê yewîtîya neteweyî ya şarê Kurdî zî xo dir bîyaro. Awanbîyayîşê yewîtîya neteweyî ya şarê Kurdî zî amyayîşê azadî, wedartişê sînoran û yewbîyayîşê her çar perçeyan o.
Bi hêvîya ke cinîyê Kurdan bibê yewî û rayêke bîne ti dewlet û ti qiwetêke nêeşko bi qirkerdişan şarê Kurdî ser de bêro, bi hêvîya vînayîşê hîrê hezar cinî û tûtê ke vinîbîyayê û resnayîşê înan war û keyanê xo serreageyrayîşê fermanê 3’ê Tebaxe de rayêke bîne sere de serreyê cinîyan, serreyê şarê ma yê Êzdîyan û yê heme şarê Kurdî sax bo.
