Keyeyê gerîlayê HPGyî Agît Îpeko ke 23ê gulana 2017î de Dêrsim de pêkewtiş de cuya xo vindî kerdbî, nêeşkeno cenazeya lajê xo bigêro. Keye seba girewtişê cenazeya lajê xo 2 serrî û 3 mengî yo bajar bi bajar gêreno
Keyeyê gerîlayê HPGyî Agît Îpekî yo ke 23ê gulana 2017î de Dêrsim de pêkewtiş de cuya xo vindî kerdbî, nêeşkeno cenazeya lajê xo bigêro. Dimayo ke xebere amî ke Îpekî cuya xo vindî kerda maye Halîse Aksoye muracatê Dezgeyê Tibê Edlî (ATK) yê Meletî û Serdozgerîya Komere ya Dêrsimî kerd, labelê netîceyêk nêgirewt. Dima ke aye ra ame vatene ke cenaze amîya berdene bi Dezgeyê Tibê Edlî (ATK) yê Stenbolî aye Dêrsim de nimûneyê gonî da, labelê hewna derheqê teşhîsê cenazeye de zî hayîyêk aye rê nêdîyaye.
Dêrsim, Meletî, Stenbol
Halîse Aksoye dimayo ke pêhesîya ke lajê aye cuye xo vindî kerda mabênê Dêrsim, Meletî û Stenbolî de şîye amîye, no 2 serrî û nîm o ke wazena bireso cenazeya lajê xo. Aksoye va: “Nizdê 2 mengî verî ma xebere girewtene cenaze ATKyî yê Meletî de ya, ma şîyî Meletî, înan ma ra vat cenazeyêka winayêna tîya çina. Dima ke ma Meletî ra agêrayî ma şîyî Dêrsim de muracatê dozgerîye kerd, înan ma ra vat cenazeyêka winayêne esta û vat ganî şima gonî bide. Dimayo ke ma gonî daye ma agêrayî Amed. Wextêk ra dima înan ma ra vat cenaze şirawîyaya bi Stenbol. Ez do şîrî Stenbol û heta cenazeya lajê xo bigêrî ez do bişewe û biroje ûca vinderî û nêgêrî a. Nika ma do dimayê dora kartol, pîyazî ra bikewê dora cenazeyan? Dezgeyê Tibê Edlî (ATK) yê Stenbolî avûkatê ma ra vat ke muracatê şima gîrîyayo dore û gama dore bêro do hayî bide şima. Dosyaya ma zî gonîya ma zî resaya ATKyî, la ma rê hayîyêk nêdîyena.
Nê roşanî de ez wazena cenaze bivînî
Aksoye vat di serrî yo a umîdêk dima ya û va: “Roşan beno nizd. Nê roşanî de ez wazena cenazeya lajê xo bivînî. Ê nêzanê ke 2 serrî yo ez çi ancena. Di serrî yo ez umîdêk dima ya. Ez do dimayê nê vera medî.” AMED
