Girtiyê nexweş Tahîr Çetînkaya ku duh li Girtîgeha Hejmara 2 a Tîpa F a Sîncanê jiyana xwe ji dest dabû, li Colemêrgê hat veşartin
Girtiyê nexweş Tahîr Çetînkaya ku beriya 8 mehan bi angaşta ku piştgiriya rêxistinê kiriye, li gundê xwe Tiyarê yê girêdayîna navçeya Çelê ya Colemêrgê hatibû binçavkirin û girtin, ji ber nexweşiya ûr duh li Girtîgeha Hejmara 2 a Tîpa F a Sîncanê jiyana xwe ji dest da. Cenazeyê Çetînkaya îro hat Colemêrgê. Rêveberên HDP’ê û xizmên Çetînkaya jî di nav de girseyeke mezin cenazeyê Çetînkaya li Geliyê Zê pêşwazî kir û bir li Goristana Solan a li taxa Simbil a navenda Colemergê veşart.
Kurê Çetînkaya Ubeydullah Çetînkaya piştî veşartina cenazeyê bavê xwe axaftineke kir û ev tişt anî ziman: “Neheqiyeke mezin li bavê min hat kirin. Dewletê neheqiyeke mezin li me kir. Li gel ku bavê min girtiyê nexweş ê giran bû jî bavê min ji girtîgehê dernexistin. Ji ber vê mirinê êşeke mezin bi me dan kişandin.”
Pismamê Çetînkaya Şahîn Çetînkaya jî derbarê pismamê xwe de ev tişt gotin: ” Tahir cihê vala girtin. Sûcê wî ew bû ku li gundê xwe dijiya û xwarin dida mêvanên xwe. Sûcekî wî jî tunebû. Jixwe ji ber piyê xwe berasteng bû. Li gel vê yekê jî dewletê neheqiyeke mezin li me kir û ew girt kir girtîgehê û bû sedema mirina wî. Tahir ji ber tewanbariyeke derew hatibû girtin. Me xwest li girtîgehê biçin cem lê destûr nedan me. Me ji dozgeriyê destûr xwest lê tenê hiştin kurê wî 5 deqeyan ew bibîne.”
Çetînkaya ku di 67 saliya xwe çû ser dilovaniya xwe 10 zarokên wî hebûn. Şîna Çetînkaya li Mizgefta Çetînlera hat danîn. COLEMÊRG
