Hemserekê HDPyî yê Amedî Zeyat Ceylano ke derheqê konferansan de qisey kerd vat: “Çareserîya heme probleman pîya bi şarî têgêrayîşî ra ravêreno. Ganî sazî û partîyî tena vervatoxê bikerê û ma şarî esas bigêrê.”
Hemserekê Partîya Demokratîke ya Şaran (HDP) yê Amedî Zeyat Ceylanî derheqê detayanê konferansanê herêmîyan de ANFyî rê qisey kerd. Ceylanî vist vîrî ke konferansan de tena rojedê Rojakewtena Mîyanêne, Kurdistan û Tirkîya nêgêrîyo dest, heman wextî de statuyê Kurdan zî rojdem de cayê xo girewto û ard ziwan ke konferansan de babetê ke zaf vejîyayî vernîye polîtîkayê şerî yê vera Vakurê Kurdistanî û tehdîtê vera Rojawanî bî. Reyna hêrişê îşxalî yê vera Başûrî zî rojdemê de bi.
Ceylanî vat: “Ewro tewirê PDK û YNKyî yê vera îşxalê Başûrî yeno rexnekerdene. Ma înan ra nêvanê Tirkan rê dişmenîye bikerê. Eke semedê holê Kurdan dostîye kenê wa bikerê. La heqê înan çîno ke serê gonîya Kurdan ra dostîye bikerê. Ma naye rê çimanê xo nêqefilnenê. Kurdî naye qebûl nêkenê. Coka ma nê tewirê hukmatê Başûrê Kurdistanî rexnê kenê û vanê ke no tewir yewîya neteweyîye rê xizmet nêkeno. Hukmatê Başûrî ganî destê xo binê kerra bikero û semedê çareserîya problemanê Vakurê Kurdistanî zî xebatanê diplomasî bikero. Wina eşkenê şarê ma rê xizmet bikerê. Konferans de ma nînan ser o qisey kerd. Reyna polîtîkaya asîmîlasyonî, rijnayîşê bajaran, tecrîdê serê Rayberê Şarê Kurdî Abdulah Ocalanî û xoverdayîşê vera tecrîdî ameyî qiseykerdene.”
Ceylanî wina dewam kerd: “Çareserîya heme probleman pîya bi şarî têgêrayîşî ra ravêreno. Ganî sazî û partîyî tena vervatoxê bikerê û ma şarî esas bigêrê. Hêzê ko heme problemanê cimatkî çareser keno şar bi xo yo. Karê sîyasetkaran oyo ke dewan ra heta mehleyan, qezayan ra heta bajaran zemînê rexistinbîyayîşî akero. Heta ke zemînê winayên nêrê akerdene rojdemê ma de çi beno wa bi bo,ma nêeşkenê ci rê cewab bo. Eke ma wina têbigêrê çew nêeşkeno bi asîmîlasyon tarîxê ma bidê ma vîrakerdene.”
Ceylanî qiseykerdişê xo wina qedîna: “Ewro ma çend rêxistinkerde tê bigêrê ma hende eşkenê aver şirê. Tena rêxistinbîyayîşê sazîyan nêvejeno. Ma wina nêeşkenê waştişanê şarî rê bibê cewab. Eke ma torra rêxistinbîyayîşî pîya bi şarî awan bikerê û hîra bikerê ma eşkenê vera polîtîkaya hêrişkare ya vera Kurdan de vinderê. Hete ke çew rêxistinbîyayê nêbo kes çewî esas nêgeno. Coka rêxistinbîyayîş şert o.” AMED
