Polîsan bi ser avahiya HDP’a Mûşê de girt. Polîsan di serdegirtina malan de jî hevserokên HDP’ê yên bajêr binçav kirin
Polîsan li Mûşê serê sibê bi ser malan de girtin. Polîsan avêt ser mala Hevserokên HDP’a Mûşê Ferhat Çaki û Muhlîsê Karaguzel û wan binçav kirin. Kutbettîn Çelîk jî hat binçavkirin. Polîsan piştî binçavkirinê bi ser avahiya HDP’a Mûşê de jî girt û li vir lêgerîn pêk anîn. Sedema binçavkirinê nehat zanîn û binçavkiriyan birin Miduriyeta Polîsan a Mûşê.
Parlamenterê HDP’ê yê Mûşê Mensûr Işik bi ser de girtina malan û binçavkirina hevserokên partiya xwe şermezar kir û wiha got: “Bi salane bi vê nêzîkatiyê têkoşîna me ya demokrasiyê û siyasî têk bibin û biçewisînin. Bloka faşîst a AKP’ê û MHP’ê her roj qels dibe. Her roj gelê me xwedî li partiya xwe derdikeve. Bloka faşîst a ku vê xwedî derketinê dibîne dixwaze me biçewisîne. Di rojên dawî de pêla binçavkirin û girtina hevalên me li bajarên herêmê zêde bûye. Bila viya ji bîr nekin, çi dibe bila bibe em ê dest ji têkoşîna xwe bernedin. Ji bo avakirina siyaseta demokratîk û aştiyane em ê hin bêtir têbikoşin.” MÛŞ
