Birayê Rayberê Şarê Kurdî Abdullah Ocalanî Mehmet Ocalanî da zanayene ke Abdullah Ocalanî veng dayo ke wa seba yewîya kurdan fedakarîye bêro kerdene
Birayê Rayberê Şarê Kurdî Abdullah Ocalanî Mehmet Ocalano ke bi wesîleya Roşanê Qurbanî şi Îmrali, derheqê pêvînayîşî de Ajansê Mezopotamya rê qisey kerd û va : “Abdullah Ocalanî semedê yewîya kurdan veng dayo.”
Mehmet Ocalanî ard ziwan ke o serra 2016î ra reya 3ina ke şino Îmrali û va: “Ma verê pêvînayîşî cigêrayîşanê zaf xiraban ra ravêrtî. Cigêrayîşê winayênî merdimîye qebûl nêkena. Nînan ke no cigêrayîş kerd wa xora bişarmê. Her pêvînayîş de rîyê mi ewnîyeno berî ra. Na rey înan waşt ke ez rîyêxo açarnî. Serek ame ma destê yewbînan girewt, va ‘mi şima nêpawetene’ û rojdemî persa. Mi rojdem sey Vakur û Rojakewtena Sûrîya, Harekatê Pençe û meseleyanê dezgehan rêz kerdî û mi va ‘şar weşîya ti meraq keno’ ê zî va, ‘xora ti mi vînenî.’”
Vakur û Rojakewtena Sûrîye
Bira Ocalanî da zanayene ke Ocalanî derheqê Vakur û Rojakewtena Sûrîye de nê vatî: “No bi şerî nêbeno, ganî bêro çareserkerdene. Hem Tirkîya hem zî şarê ûcayî zirar vînenê. No şaran rê qezenckerdiş nê zirar ano. Ez 20 serrî Sûrîye de menda, şarê ûcayî hol nas kena. Eşîranê ereban ê hol nas kena, tekîlîya mi esta. Sere de eşîrê ereban şaran rê silamanê mi vajênê. Problem bi demokrasî çareser beno. Çi rey bi şerî çareserîye nêbîya.”
Yewîya Neteweyîye
Ocalanî derheqê hêrişê îşxalî yê vera Başûrî zî nê vatî: “No hêriş yeno manaya şerî. Na mesela bi rişnayîşê gonîya merdimî nêna çareserkedene.Xora bê hetkarîya Hukmatê Kurdistanê Federalî Tirkîya nêeşkena ser bikewo. No harekat derbe dano yewîya kurdan ro. Ganî heme kurdî semedê yewbîyayîşê kurdan fedakarîye bikerê û bixewtîyê. Ma tim aştîye rê hadre yî. Her tim zî vera şerî vejîyenê. Herinda şerî de ganî haştîye bibo.”
HDPyî rê mesaj
Ocalanî derheqê HDPyî de zî wina va: “60 parlamenterî estê, nê weçînitişî de şaredarîye zî girewtî. Mi reyêk vatbi eke ez teber de bîyêne, mi kuçeyî kerdêne pak. Ganî parlamenterî her ca de 24 saete mîyanê şarî de bê. Partîye dezgeho gird û demokratîk a. Îradeya şarî ya û ganî şarî rê xizmet bikero. Nê şarî îradeyê xo teslîmê înan kerd. Ê zî xizmetkarê şarî yê.” RIHA
