Berpirsê Neteweyên Yekbûyî yê Mafê Mirovan li Iranê Cawîd Rehman da xuyakirin ku rewşa mafê mirovan di warê azadiya ramanê û mafê mirovan de li Îranê bi balkêşî tên berdewamkirin û Îranê asta darvekirinê gelekî zêde ye.
Li gorî Cawîd Rehman li Îranê 253 kes di sala 2018 an de hatine bidarvekirin ku di nava wan de 7 zarok jî hene. Rehman da xuyakirin ku ev hejmar li gorî salên berê kêmtire lê hê jî di cîhanê de di rêza herî pêş de ye.
Li gorî Rehman sedema kêmbûna darvekirinan vedigere sererastkirinên qanûnî yên di sala 2017 de derbarê bikaranîna madeyên hişbir de hatibûn kirin. Di sala 2017’an de 231 kes ji ber madeyên hişbir hatibûn bidarvekirin lê di sala 2018’an ji bo heman sedeman 24 kes hatine bidarvekirin.
Li gorî qanûnên Îranê derdora 80 sûcan hene ku cezayê wê darvekirine û piraniya wan sûcan li welatên din ên cîhanê ne wiha ye.
Rehman da xuyakirin ku tevî gelek caran Neteweyên Yekbûyî ji bo darvekirina zarokan Îranê hişyar kiriye lê dîsa jî di nava zarokên hatine bidarvekirin de 2 zarokên 17 salî hene ku ji ber bûyerên dizîyê hatine bidarvekirin. AMED
