Hemşaredarê Bajarê Girdî yê Mêrdînî Ahmet Turkî vera qeyûmî razînêbîyayîş nîşan da û va: “Ma demêko huqûq çîn o û neheqîya tewr girde yena kerdene ciwîyenê.”
Hemşaredarê Bajarê Girdî yê Mêrdînî Ahmet Turkî tayînkerdişê qeyûmî rê razînêbîyayîş ramot û vat îradeyê şarî xesp kenê û naye ra vanê demokrasî.
Wezîrîya Karanê Zereyî Walîyê Mêrdînî Mûstafa Yamano ke bi karanê xo yê leyşinan tim rojdem de yo reya diyîne sey qeyûmî Şaredarîya Bajarê Girdî ya Mêrdînî rê tayîn kerd. Yemanî şaredarîya ke nêzdê 3 serrî îdare kerd, fînayebî binê deynanê girdan û açarnayebî enqazî. Weçînitişê 31ê Adare de HDPyî sede 56 reyî girewtî û Ahmet Turk sey hemşaredarî amebi weçînitene. Turkî vera qeyûmî hêrsê xo ard ziwan û va: “Çîyê ke benê bi aqil û mantiq nênê îzahkerdene. Ma demêko huqûq çîn o û neheqîya tewr girde yena kerdene ciwîyenê. Îradeyê şarî nas nêkenê û naye ra vanê demokrasî. Her çî eşkera meydan de yo. No xespkerdişê îradeyê şarî ramojneno ke welat de sîyaseto demokratîk nêno rayraberdene.” MÊRDÎN
