Rayberê Şarê Kurdî Abdullah Ocalanî 7ê Tebaxe de avûkatanê xo reyde pêvînayîşêk viraşt û mesajê Ocalanî hetê avûkatan ra amebi parekerdene. Ocalanî mesajê xo de qala hewldayîşê xo yê çareserîye kerdbî û dîyar kerdbî ke o seba çareserîye amade yo
Verfekê Teşebbusê 78an Celalettîn Canî derheqê mesajê Ocalanî û Korîdorê Ewleyîye de qisey kerd. Canî bale ante grevê vêşanîye ser û wina va: “Wexto ke grevî qedîyayêne, Ocalanî avûkatan ra vatbi ‘nê pêvînayîşî nînî manaya muzakereyan’ û veng dayêne hêzanê demokrasî yê Tirkîya. Pêvînayîşo peyên de zî ame dîyayene ke hewldayîşê Ocalanî yê seba çareserîye dewam kenî, labelê hetê dewlete ra gamêke nîna eştene.”
Canî dewamê qiseykerdişê xo de va ‘Erdogan û hemparê ci goreyê xo tayê çîyan kenî’ û wina dewam kerd: “Labelê heta nika çîyê ke ameyî ceribnayene û netîce nêameyo girewtene ra vîşêr, çîyêk nîno kerdene. Ewro bin nameyê ewleyîye de teşebbusê dagîrkerîye yeno kerdene. Amerîka herême de wayîrê vatişî ya û wina aseno ke nika ra pey sînorî bi leşkeranê Amerîka bêrî pawitene. Tena sucê Rojawanî kurdbîyayîş o.”
Krîz her ke şono kûrêr beno
Canî peynîya qiseykerdişê xo de va ‘krîzo ke Tirkîya tede yo, her ke şono kûrêr beno’ û wina qedêna. “Şîyayîş nîşan dano ke krîz her ke şono kûrêr beno. Ocalan şîyayîşê Tirkîya baş nêvîneno û cok ra seba şîyayîşî etirîyeno. Ocalan hewl dano ke netîceyê nê şîyayîşî nîşanê herkesî bido. No semed ra Ocalan dîyar keno ke o estena îradeya ke qerardarîya Ozalî nîşan bido muhakeme keno. Yanî wazeno vajo ke Ozalî şertanê tewr zehmetinan de qerardarîye nîşan daye, ewro şertê şima hîna baş î û şima eşkenî aştîya awan bikerî û Tirkîya şerî ra bixelisnî.” ANQARA
