Li dijî tayînkirina qeyûm a ser Şaredariya Bajarê Mezin a Amedê gelê kurd bi bertek û bi hêrs e. Li gel êrîşên faşîzan ên polîsên rejîma AKP/MHP gelê kurd xwedî li vîna xwe dertên û berxwedanê geş dikin
Duh desthilatiya AKP/MHP’ê careke din vîna gelê kurd nas nekirin û xesp kirin. Rejîma AKP/MHP’ê li dijî gelê kurd û siyasetmedarên kurd darbeyek siyasî pêk anîn û hevşaredarên bajarê mezin ên Amed, Wan û Mêrdînê ji pêywirê girtin û li şûna wan qeyûm tayîn kirin. Gelê kurd ku wekî her car dayik pêşengiya berxwedanê dikin bi taybetî li Amedê, Wan û Mêrdînê li ser piyan e û xwedî li vîna xwe derdikevin. Bertekên li dijî tayînkirina qeyûman a li ser şaredariyên bajarên mezin ên Amed, Mêrdîn û Wanê li gel êrîşa tund a polîsên rejîma AKP/MHP’ê ranawestin û berfireh dibin.
Li Amedê welatî ji duh ve ye li ser piyan e û li dijî qeyûm xwedî li vîna xwe derdikevin. Ji ber çalakiyên ku tên lidarxistin, hemû rêyên ku dertên Kolana Xarpêtê ku Şaredariya Bajarê Mezin a Amedê lê ye û Kolana Lîseyê ji trafîkê re hatin girtin. Li gel dorpêça polîsan jî bi sedan welatî ji saetên serê sibehê ve li vir kom bûn. Welatî derbasî Kolana Lîseyê bûn û xwe spartin barîyerên polîsan û bi dûrişmeyan bertekên xwe nîşan dan. Polîsan bi ava şit a ji TOMA’yan û gaza îsotê êrîşî welatiyan kir. Li gel vê yekê jî girseyê kolanê terk nekir û çalakiya xwe domand. Li ser êrîşa polîsan a bi bombeyên gazê hêrsa welatiyan jî derket asta herî jor û bertekên tund nîşanî vê êrîşa faşîzan dan. Li gel hemû êrîş û astengiyên polisan jî çalakî her ku diçe berbelav dibin û didomin.
Li Wanê çalakî didome
Li Wanê jî parlamenterên HDP’ê yên herêmê, hevşaredar, rêveberên bajar û navçeyan ên HDP’ê, xwestin li dijî tayînkirina qeyûman a ser 3 şaredariyên HDP’ê, şermezar bikin. Girseya ku xwest ji avahiya HDP’ê ber bi Parqa Feqiyê Teyran ve bimeşe, rastî êrîşa polîsan a bi ava şid û ço hat. Dema êrîşê, parlamenterê HDP’ê yê Agiriyê Abdullah Koç û welatiyek birîndar bûn. Di encama êrîşa polîsan de herî kêm 30 kes hatin binçavkirin. Li gel êrîşa polisan jî çalakiya gel û HDP’iyan bedewam dike. Çalakiya li Wanê jî her ku diçe berfireh dibe.
HDP’iyan rê li trafîkê girt
Li Mêrdînê jî bi sedan endam, rêveber, hevşaredar û parlamenterên HDP’ê bi armanca tayînkirina qeyûm a Şaredariya Bajarê Mêrdînê şermezar bikin xwestin bimeşin şaredariyê. Lê polîsan ew asteng û êrîş kirin. Girseya HDP’ê ku rastî êrîşa polîsan a bi ava şit hatin, reya Navbera Qoser û Mêrdînê li trafîkê girtin. Piştî ku polîsan muxadaxe zêde kir girsê dirûşmeya “Zext me bêzar nakin” berz kirin û çalakiya xwe berdewam kirin. Rawasetîna girsê ya li ser kolanê didome.
