Serekwekîlê Gruba HDPyî Saruhan Oluçî vist vîrî ke Edogan û Soylûyî demê weçînayîşî de tayînkerdişê qeyûmî da eşnawitene û dimayê weçînitişî dest bi amadekarîya ci kerd û va: “Soylûyo ke vano ‘qerar huqûqî yo’ zure keno.”
Vera xespkerdişê şaredarîyanê HDPyî yê ke bi qeyûmê îqtîdarê AKP-MHP-Ergenekonî ameyî destseranayene razînêbîyayîşî her roje zêdîyenê. Wezîrê Karanê Zereyî yê Tirkî Suleyman Soyluyî vatbi ke ‘qerar huqûqî yo’. Serekwekîlê Gruba Partîya Demokratîke ya Şaran (HDP) Saruhan Oluçî derheqê eşkerayîya Soylûyî de ANFyî qisey kerd.
Serekwekîlê Gruba HDPyî Saruhan Oluçî vist vîrî ke Edogan û Soylûyî demê weçînayîşî de tayînkerdişê qeyûmî da eşnawitene û dimayê weçînitişî dest bi amadekarîya ci kerd û va: “Soylûyo ke vano ‘ qerar huqûqî yo’ zure keno. Eşkerayo ke no qerarêko sîyasî yo. Erdoganî demê weçînitişî de şarê Kurdî ra vatêne ‘ şima se kenê bikerê, ma do şima îdare bikerê.’ Reyna Soylû zî dimayê 31ê Adare vatbi eke qeyûmê ma 5 serrî dewam bikerdêne HDP werte ra ameyêne wedartene. Cok ra vatişê mesela huqûqî ya zureka girde ya. Mesele temamî sîyasî ya. Îqtîdaro ke sandiq de kerd vînî, bi hêrişî wazeno bigero. Heqê weçînitişî yê şarî ameyo xespkerdene. No qetilkerdişêk o, qetilkeridşo plankerde yo. Bawerîya ma huqûqê dewlete rê nêmanda la rixmê naye ma do mucadeleyê xo yê huqûqî rê dewam bikerê.” AMED
