HDP seba 1ê êlule Roja Aştîye ya Dinya, Amed de mîtîng virazeno. Endamê Komîteya Amedekar ya Mîtîngî Saît Demîrî dîyar kerd ke seba aştîye ganî hîna zêde veng bêro verzkerdene û vengê tewrbîyayîşê mîtîngî kerd
Partîya Demokratîke ya Şaran (HDP) seba 1ê êlule Roja Aştîye ya Dinya bi siloganê ‘Seba aştîyeka bi rumet çareserîya demokratîke’ Raşteyê Îstasyonî de mîtîng virazena. Komîteya Amedekar ya Mîtîngî awanîya HDPyî ya bajarî de kombîyayîşê çapemenî viraşte. Rayîrberê HDPyî, Partîya Herêmê Demokratîkî (DBP) û Serekê Partîya Sosyalîstanê Bindeste (ESP) Ramazan Kaya û temsîlkarê rêxistinê komelkî tewrê kombîyayîşî bîyî.
Endamê Komîteya Amedekar ya Mîtîngî û Hetgirê Hemserekê Bajarî yê Amedî Saît Demîrî kombîyayîş de qisey kerd û dîyar kerd ke xebatê mîtîngî kerdî û muracatê komeleyanê sivîlan dayî. Demîrî da zanayene ke do mîtîngî de waştişê aştîye bîyarî ziwan ser û va: “Seba prosesê şerî ke 40 serrî yo cografyaya ma de dewam keno, agêrayîşê prensîpanê aştîye, ganî ma vengê xo berz bikerî. Umudê heme şarî noyo. Seba aştîyêka bi rumet çîyo ke keweno milê ma ser têkoşîndayîş o.”
Demîrî dewamê eşkerayîye de va: “Bi polîtîkayanê qayûmî û şîdetî netîce nîno girewtene. Prosesê 40 serran no nîşan dano. Ganî her kes tewrê mîtîngî bibo.”
Mîtîng do do 1ê êlule de saet 15.00î ra heta 19.00î Raşteyê Îstasyonî de dewam bikero. AMED
